कोल्हापूर : घरगुती गणेश विसर्जनादिवशी प्रत्येक घराच्या दारात ट्रॅक्टरमधून पाण्याची काहील पाठवली जाणार आहे. विसर्जनासाठी पाणवठ्यावर गर्दी होऊ नये, यासाठी रुईकर कॉलनीतील माजी नगरसेविका उमा इंगळे यांनी यंदाही हा उपक्रम राबविण्याचा निर्णय घेतला आहे.
मंगळवारी घरगुती गणेशमूर्तींचे विसर्जन होणार आहे. अशा वेळी पाणवठ्यावर गर्दी होऊ नये, त्यातून कोरोनाचा संसर्ग वाढू नये आणि संपूर्ण परिवारासोबत घराच्या दारातच लहान, ज्येष्ठ नागरिकांच्या समोर गणेशमूर्तींचे पर्यावरणपूरक विसर्जन व्हावे, यासाठी इंगळे यांनी हा उपक्रम आखला आहे. प्रभागातील नागरिकांनी ९४ २१ २० ६९ ९८ या क्रमांकावर उदय इंगळे यांच्याशी संपर्क साधावा, असे आवाहन करण्यात आले आहे. रुईकर कॉलनीसह हिंद को-ऑपरेटिव्ह सोसायटी, अयोध्या पार्क, रुक्मिणी नगर, एलआयसी कॉलनी, लक्ष्मीनगर सोसायटी, भीम विजय हौसिंग सोसायटी, त्रिमूर्ती हौसिंग सोसायटी आणि प्रभागातील प्रमुख तरुण मंडळांच्या सहकार्याने हा उपक्रम राबविण्यात येणार आहे.
रस्त्यावर नागरिकांची, वाहनांची गर्दी होऊ नये, पाणवठ्यांचे प्रदूषण होऊ नये आणि कोरोनाच्या पार्श्वभूमीवर गर्दी होऊ नये, यासाठी सलग दुसऱ्या वर्षी राबवण्यात येत असलेला हा उपक्रम अनुकरणीय आहे.