अपर पोलीस अधीक्षक जयश्री गायकवाड
लोकमत न्यूज नेटवर्क
इचलकरंजी : शहरातील दुकाने उघडण्यास परवानगी मिळावी, यासंदर्भात निर्णय घेण्यासाठी व्यापाऱ्यांसोबत झालेल्या बैठकीत या मागणीबाबत जिल्हाधिकारी निर्णय घेतील, तोपर्यंत व्यापाऱ्यांनी प्रशासनाला सहकार्य करावे, असे आवाहन अपर पोलीस अधीक्षक जयश्री गायकवाड यांनी केले. त्यामुळे व्यापाऱ्यांचा प्रश्न सध्यातरी प्रलंबितच राहिला आहे.
येथील विविध व्यापारी संघटना, नागरिक मंच व प्रशासन यांची शिवाजीनगर पोलीस ठाण्यात संयुक्त बैठक पार पडली. सुरुवातीला शहरातील कोरोना रुग्णांची संख्या कमी होत नसल्याबाबत प्रथम चर्चा झाली. यावेळी व्यापाऱ्यांनी गेली ७० दिवस प्रशासनास सहकार्य केले आहे. आता आमची सहनशीलता संपली आहे. आम्हास एक दिवसाआड किंवा रोज ४ तास व्यवसाय करण्यास मुभा द्यावी, अशी ठाम भूमिका घेतली, तसेच व्यापाऱ्यांवर कारवाई करून किंवा गुन्हे दाखल करून हा प्रश्न सुटणार नाही, असे सांगितले. प्रशासन जिल्हाधिकारी व जिल्हा पोलीस अधीक्षक यांच्यापर्यंत मागण्या प्रभावीवणे पोहोचवत असून जिल्हा प्रशासन निर्णय घेईल, अशी माहिती दिली.
यावेळी पोलीस उपअधीक्षक बाबूराव महामुनी, अपर तहसीलदार शरद पाटील, उपमुख्य अधिकारी केतन गुजर, पोलीस अधिकारी श्रीकांत पिंगळे, गजेंद्र लोहार व इनामचे सदस्य उपस्थित होते.