पेठवडगाव : नवे पारगाव येथे झाडाखाली तीन पानी जुगार खेळत असलेल्यांवर वडगावच्या स्थानिक गुन्हे शाखेने छापा टाकून दहा जणांना अटक केली. याप्रकरणी एक लाख ९४ हजार रुपयाचा मुद्देमाल हस्तगत करण्यात आला आहे. ही कारवाई गुरुवारी दुपारी ३.३० च्या सुमारास करण्यात आली. चार दिवसातील जुगार खेळणाऱ्यांविरोधात ही तिसरी कारवाई आहे.
याप्रकरणी बाजीराव आनंदा कांबळे (वय ३१), मंगेश जयपाल ओवाळे (वय ३८), बापुसो बाबुराव लोखंडे (वय ३६), समीर इस्माईल मुल्ला (वय ४२), अतुल चंद्रशेखर कांबळे (वय २२), अशोक आनंदा कांबळे (वय ६५), सुनील सुरेश शिंदे (वय ४५), इमामहुसेन लाडसाहेब टुगलडोने (वय ६०), कपिल विजय कांबळे (वय २६ सर्व रा. नवे पारगाव), अमित भास्कर कांबळे (वय ३५ रा. तळसंदे), अशी अटक करण्यात आलेल्यांची नावे आहेत. याबाबत फिर्याद पोलीस नाईक प्रमोद चव्हाण यांनी दिली. तपास हवालदार अमरसिंह पावरा करीत आहेत.