जनता निश्चितच पाठबळ देईल

प्रकाश आवाडे : राहुल आवाडेंच्या प्रचारार्थ हुपरी, तळंदगेत सभा

हुपरी : कोल्हापूर जिल्हा ताराराणी विकास आघाडी आणि स्वाभिमानी शेतकरी संघटनेच्या उमेदवारांनी प्रत्यक्ष मतदारांच्या भेटी घेऊन घर अन् घर पिंजून काढले आहे. त्यामुळे जनता निश्चितपणे पाठबळ देईल. त्याचबरोबर समाज कल्याण सभापती किरण कांबळे यांनी भागात केलेल्या विकासकामांच्या जोरावर प्रत्येकाला आपलेसे केले आहे. त्यामुळे पारदर्शी कारभारासाठी हुपरी मतदारसंघातील जनता जिल्हा परिषदेच्या उमेदवार कविता हांडे आणि पंचायत समितीच्या उमेदवार साधना बुगटे व किरण कांबळे यांना मताधिक्य देईल, असा विश्वास माजी मंत्री प्रकाश आवाडे यांनी व्यक्त केला.कोल्हापूर जिल्हा ताराराणी विकास आघाडी व स्वाभिमानी शेतकरी संघटनेच्या उमेदवारांच्या प्रचारार्थ हुपरी, तळंदगे, इंगळी, आदी ठिकाणी प्रचारार्थ कार्यकर्त्यांची आढावा बैठक पार पडली. त्याप्रसंगी मार्गदर्शन करताना आवाडे बोलत होते. ते म्हणाले, जिल्हा परिषद असो पंचायत समिती असो त्याठिकाणी काम कसे करावयाचे, याची मार्गदर्शक तत्त्वे आवाडे कुटुंबीयांनी पारदर्शी कारभारातून शिकविली आहेत. हुपरीतील पाण्याचा प्रश्न, पंचतारांकित औद्योगिक वसाहतीला जोडणारा रस्ता, चांदी उद्योगातील विविध अडचणी व समस्या सोडविण्याचे काम सातत्याने आम्ही केले आहे. समाज कल्याण सभापती किरण कांबळे यांनी जिल्हा परिषदेच्या माध्यमातून पाणी, रस्ते, गटारी अशा नागरी सुविधांसह महिलांसाठी लघुउद्योग, शैक्षणिक प्रगती यासाठी विविध योजनांचा लाभ मिळवून दिला आहे. यावेळी मानसिंग देसाई, कुलदीप वार्इंगडे, आण्णासाहेब गोटखिंडे, आण्णासो इंग्रोळे, राजू हांडे, राहुल बुगटे, शेतकरी संघटनेचे राजाराम देसाई, सुरेश पाटील, पंचायत समितीचे रावसो पाटील, शिवाजी पुजारी, डेव्हिड कांबळे, सुवर्णा गाट, सुवर्णा गिरी, सुशीला चनगुंडी, आदींसह मान्यवर व कार्यकर्ते उपस्थित होते. (वार्ताहर)