कोल्हापूर : प्रॅक्टिस क्लब (अ)ने पॅट्रियट स्पोर्टस्वर ७-० असा, तर दिलबहार (अ)ने कोल्हापूर पोलीस संघावर ३-१ असा विजय मिळवीत मुस्लिम बोर्डिंग चषक फुटबॉल स्पर्धेची पुढील फेरी गाठली.शाहू स्टेडियम येथे रविवारी प्रॅक्टिस क्लब (अ) व पॅट्रियट स्पोर्टस् यांच्यात सामना झाला. सहाव्या मिनिटास प्रॅक्टिस (अ)च्या राहुलपाटील याने गोल नोंदवीत १-० ने आघाडी घेतली. पूर्वार्ध संपण्यास काही सेकंद बाकी असताना प्रॅक्टिस (अ)कडून ओंकार पाटीलने गोल नोंदवीत ही आघाडी २-०ने वाढविली. उत्तरार्धात ४३व्या मिनिटास प्रॅक्टिस (अ)च्या अभिनव साळोखे याने गोल नोंदवीत ३-० अशी आघाडी केली. ‘पॅट्रियट’ने बचावावर भर दिला. ४६ व्या मिनिटास प्रॅक्टिस (अ)कडून सुजित भोसलेने गोल नोंदवीत ४-० अशी आघाडी वाढविली. ५६ व्या मिनिटास ओंकार पाटीलने, तर ५७ व्या मिनिटास ऋषिकेश जठारने सलग गोल केले. यामुळे आघाडी ६-० अशी भक्कम झाली. ६३व्या मिनिटास प्रॅक्टिस (अ)कडून ओंकार पाटील याने वैयक्तिक तिसरा गोल नोंदवीत आघाडी ७-० अशी वाढवीत दणदणीत विजयावर शिक्कामोर्तब केले.दुसरा सामना दिलबहार (अ) व कोल्हापूर पोलीस संघ यांच्यात झाला. सामन्याच्या २४व्या मिनिटास पोलीस संघाकडून सोमनाथ लांबोरे याने गोल नोंदवीत १-० ने आघाडी घेतली. ३६ व्या मिनिटास दिलबहार (अ)कडून प्रतीक व्हनाळीकर याच्या पासवर अनिकेत जाधव याने हेडद्वारे गोल नोंदवीत १-१ अशी बरोबरी साधली. पूर्वार्धात दिलबहार (अ)कडून ७१ व्या मिनिटास जावेद जमादारच्या पासवर सचिन पाटीलने गोल नोंदवीत २-१ अशी पिछाडीवरून येत आघाडी घेतली. ७४व्या मिनिटास पोलीस संघाच्या गोलक्षेत्रात झालेल्या गोंधळाचा फायदा घेत जावेद जमादारने दिलेल्या पासवर सनी सणगरने गोल नोंदवीत संघाला ३-१ने विजयी केले.
‘प्रॅक्टिस’चा ‘पॅट्रियट’ला धक्का
By admin | Updated: April 20, 2015 00:14 IST