आजरा :
आजरा तालुक्यात कोरोनाचे पॉझिटिव्ह रुग्ण कमी असले तरी मृत्यूचे प्रमाण वाढले आहे. अ‍ॅक्टिव्ह रुग्णांची संख्या ३६३ असून निगेटिव्ह रुग्ण २७६८ इतके आहेत. दीड महिन्यात कोरनाने तालुक्यातील ५१ जणांचा बळी गेला असून ही बाब चिंताजनक आहे. गेले आठ दिवस कडक लॉकडाऊन असतानाही पॉझिटिव्ह रुग्ण व मृत्यूचे प्रमाण कमी झालेले नाही. उद्यापासून लॉकडाऊन शिथील केल्यामुळे बाजारपेठेला गर्दीचे स्वरूप येऊन पुन्हा कोरोना आणखी वाढण्याची भीती आहे.
तालुक्यात १ एप्रिलपासून ४२८३ नागरिकांच्या कोरोनाच्या आरटीपीसीआर व रॅपिड अ‍ॅंटिजन टेस्ट घेण्यात आल्या. त्यापैकी ४१०९ जणांचे अहवाल प्राप्त झाले असून १७४ जणांचे अहवाल अद्याप प्राप्त झालेले नाहीत. आजपर्यंत तालुक्यात १३४१ रुग्ण पॉझिटिव्ह असून २७६८ जण निगेटिव्ह आहेत. ५१ जणांना आपला प्राण गमवावा लागला आहे. सध्या तालुक्यात ३६३ अ‍ॅक्टिव्ह रुग्ण असून आजरा कोविड सेंटरमध्ये ९२, सीपीआर कोल्हापूर २, खासगी हॉस्पिटल १८, उपजिल्हा रुग्णालय गडहिंग्लज १७, रोझरी कोविड सेंटर २२, मुकुंददादा आपटे फाऊंडेशन मुमेवाडी कोविड सेंटरमध्ये ३०, घरी उपचार घेणारे १७९ रुग्ण आहेत.
आजपर्यंत ९२७ जणांना उपचारानंतर घरी सोडण्यात आले आहे. २३ मे रोजी तालुक्यात सोहाळे-बाची २, उत्तूर २, सरोळी ३, आजरा २, वझरे १, बुरुडे १, असे ११ पॉझिटिव्ह रुग्ण आहेत.
गेले आठ दिवस तालुक्यात कडक लॉकडाऊन आहे. त्यामुळे बऱ्यापैकी नागरिकांनी घरीच राहून कोरोनाला रोखण्याचा प्रयत्न केला आहे. मात्र तालुक्यातील पॉझिटिव्ह रुग्णांची संख्या व मृत्यूचे प्रमाण अद्यापही कमी झालेले नाही. त्यातच उद्यापासून लॉकडाऊन शिथील होणार असल्याने बाजारपेठेला जत्रेचे स्वरूप येणार आहे. त्यामुळे पुन्हा एकदा कोरोनाची भीती चिंताजनक आहे.