इचलकरंजी : यड्राव (ता.शिरोळ) येथील पार्वती औद्योगिक वसाहतीच्या समोर असलेल्या ढाब्याजवळ सायकल चोरल्याच्या संशयावरून केलेल्या बेदम मारहाणीत एकाचा जागीच मृत्यू झाला. अलीम गजवाल (वय ४५) असे मृताचे नाव आहे. याप्रकरणी अल्ताफ शेख (रा. खोतवाडी, ता. हातकणंगले) या यंत्रमाग कारखानदारास शहापूर पोलिसांनी अटक केली.
याबाबत पोलिसांतून मिळालेली माहिती अशी, गत आठवड्यात अल्ताफ शेख याची सायकल चोरीला गेली. त्याने परिसरात शोध घेऊनही त्याला सायकल सापडली नाही. चौकशीमध्ये अलीम गजवाल याने सायकल चोरून विकल्याची माहिती अल्ताफ याला समजली. यामुळे त्याने अलीम याच्याकडे सोमवारी (दि. १५) रात्री विचारणा केली. त्यावेळी अलीम हा मद्यधुंद अवस्थेत होता. उडवाउडवीची उत्तरे मिळू लागल्याने संतप्त झालेल्या अल्ताफ याने अलीमला बेदम मारहाण केली. या मारहाणीत अलीमचा मृत्यू झाला असल्याचे पोलिसांच्या प्राथमिक तपासात उघडकीस आले आहे.
मंगळवारी पहाटे ४५ वर्षीय व्यक्ती मृतावस्थेत आढळल्याची माहिती मिळताच शहापूर पोलिसांनी घटनास्थळी धाव घेतली. उपअधीक्षक बाबूराव महामुनी यांनी घटनास्थळी भेट दिली. पोलिसांना प्राथमिक चौकशीत अलीम व अल्ताफ यांच्यात वाद झाल्याचे समजले. पोलिसांना माहिती मिळाल्याचे समजताच अल्ताफ याने पलायन केले. पोलिसांनी त्याचा शोध घेऊन त्याला अटक केली.