कोल्हापूर: नव्या पुस्तकांची प्रतीक्षा संपली असून, बालभारतीची १ ली ते १२ ची विविध माध्यमांतील पाठ्यपुस्तके विक्रीसाठी उपलब्ध झाली आहेत. मंडळाकडे नाेंदणीकृत असलेल्या सर्व शैक्षणिक संस्था व अधिकृत विक्रेत्यांनी भांडारातून खरेदी करून विद्यार्थ्यांसाठी उपलब्ध करून द्यावीत, असे आवाहन बालभारतीचे संचालक दिनकर पाटील यांनी केले आहे.
नवीन शैक्षणिक सत्र सुरू होण्याआधीच बालभारतीकडून नवी पुस्तके बाजारात उपलब्ध होत असत, पण यावर्षी लॉकडाऊन परिस्थितीमुळे पुरवठा वेळेत होऊ शकला नाही. परिणामी शाळेचा पहिला दिवस विनापुस्तक अथवा जुन्या पुस्तकावरच गेला. आधीच ऑनलाइन शिक्षणामुळे शिकवण्याचा गोेंधळ सुरू असताना पुस्तकेच उपलब्ध होत नसल्याने अभ्यासाचे व आकलनाचे काय? असा प्रश्न उभा ठाकला होता. आता नवी पुस्तके येत असल्याने विद्यार्थी, शिक्षकांसह पालकांनीही सुटकेचा नि:श्वास सोडला आहे.
कोरोनाच्या साथीमुळे नियमित व्यवहार बंद असून काही शहरांतील दुकाने अद्याप सुरू झालेली नाहीत. विद्यार्थ्यांचे शैक्षणिक नुकसान होऊ नये यासाठी सर्व पाठ्यपुस्तके मंडळाच्या www.ebalbharati.in या संकेतस्थळावरदेखील पीडीएफ स्वरूपात उपलब्ध करून दिली आहेत. विद्यार्थ्यांना आवश्यक असणारी सर्व पाठ्यपुस्तके मंडळाच्या संकेतस्थळावरून विनामूल्य डाऊनलोड करून घेता येत असल्याने शिक्षणात कोणताही खंड पडणार नाही, असेही पाटील यांनी सांगितले.
चौकट ०१
पुस्तक भांडारातही किरकोळ विक्री
शैक्षणिक संस्था, विद्यार्थी, पालक, शिक्षक यांनाही पाठ्यपुस्तके उपलब्ध होण्यासाठी मंडळाच्या सर्व विभागीय भांडारात किरकोळ विक्री सुरू ठेवण्यात आली आहे. शैक्षणिक वर्ष २०२१-२२ करिता सर्व वर्गांच्या सर्व माध्यमांची पाठ्यपुस्तके मंडळाच्या मुंबई (गोरेगाव), पनवेल, पुणे, नाशिक, औरंगाबाद, लातूर, अमरावती, नागपूर व कोल्हापूर या ९ विभागीय भांडारांमध्ये विक्रीसाठी उपलब्ध आहेत.
ही पुस्तके मिळणार
उपलब्ध माध्यमे इ. १ ली ते इ. ८ वी – १० माध्यम (मराठी, इंग्रजी, हिंदी, उर्दू, गुजराती, कन्नड, सिंधी, तेलुगु, तमिळ व बंगाली), इ. ९ वी व इ. १० वी – ८ माध्यम (मराठी, इंग्रजी, हिंदी, उर्दू, गुजराती, कन्नड, सिंधी व तेलुगु), इ. ११ वी व इ. १२ वी – विज्ञान शाखा (इंग्रजी माध्यम), वाणिज्य व कला शाखा - २ माध्यम (मराठी व इंग्रजी).