कागल
: गेल्या दीड-दोन महिन्यांपासून पेट्रोल दर सतत वाढत आहेत. आजघडीला पेट्रोल दर लिटरला शंभर रुपयांच्याही पुढे जाऊन पंतप्रधान नरेंद्र मोदी शतकवीर ठरले आहेत. पेट्रोल दराची ही सेंच्युरी गोरगरिबांचे कंबरडे मोडणारी आहे, अशी टीका ग्रामविकासमंत्री हसन मुश्रीफ यांनी केली.
सोमवारी येथील गैबी चौकात राष्ट्रवादी काँग्रेस पार्टीच्या वतीने पेट्रोल दरवाढीच्या विरोधात आंदोलन करण्यात आले. यावेळी मंत्री मुश्रीफ बोलत होते. आंतरराष्ट्रीय पातळीवर खनिज तेलाचे दर कमी होत असताना भारतात मात्र सतत पेट्रोल दरवाढ होत आहे. या दरवाढीमुळे गोरगरिबांचे कंबरडे मोडले आहे. केंद्र सरकार सर्वच पातळ्यांवर अपयशी ठरलेले आहे. पेट्रोलसह डिझेल व गॅसच्या दरवाढीने गोरगरिबांना महागाईच्या गर्तेत लोटले आहे. याप्रसंगी जिल्हा बँकेचे संचालक भय्या माने यांचेही भाषण झाले.
यावेळी माजी उपनगराध्यक्ष प्रवीण काळबर, राष्ट्रवादीचे शहराध्यक्ष संजय चितारी, दत्ताजीराव देसाई गंगाराम शेवडे, नवाज मुश्रीफ, सुधाकर कोरवी, इरफान मुजावर, संग्राम लाड, सागर गुरव, पंकज खलीफ, राजू माने, बबनराव सूर्यवंशी, अजित पाटील, बच्चन कांबळे, निशांत जाधव आदी उपस्थित होते.
फोटोओळी :
कागल - पेट्रोल दरवाढीने लिटरला शंभर रुपयांचा टप्पा गाठल्यानंतर कागलमध्ये राष्ट्रवादी काँग्रेस पार्टीच्या वतीने आज निषेध आंदोलन केले. यावेळी ग्रामविकासमंत्री हसन मुश्रीफ, बँकेचे संचालक प्रताप ऊर्फ भय्या माने, माजी उपनगराध्यक्ष प्रवीण काळबर, इतर प्रमुख मान्यवर उपस्थित होते.