कोल्हापूर : सकल मराठा समाजाच्या आरक्षणासह अन्य मागण्यांबाबत आज, गुरुवारी सायंकाळी पाच वाजता मुंबईतील मुख्यमंत्री उद्धव ठाकरे यांच्या वर्षा निवासस्थानी बैठक होणार आहे. त्यामध्ये मुख्यमंत्री ठाकरे, उपमुख्यमंत्री अजित पवार हे खासदार संभाजीराजे, मराठा समाजातील सात समन्वयकांसमवेत चर्चा करणार आहेत.
कोल्हापुरात बुधवारी सकाळी सकल मराठा समाजाच्या मूक आंदोलनामध्ये पालकमंत्री सतेज पाटील, ग्रामविकासमंत्री हसन मुश्रीफ यांनी मराठा समाजाचे आरक्षण आणि अन्य मागण्यांबाबत चर्चा करण्यासाठी गुरुवारी मुंबईला यावे, असे राज्य सरकारच्यावतीने निमंत्रण दिले होते. त्यानुसार बुधवारी सायंकाळी पाच वाजता मुंबईत बैठक आयोजित केली आहे. त्यावेळी मुख्यमंत्री उद्धव ठाकरे, उपमुख्यमंत्री अजित पवार, सार्वजनिक बांधकाममंत्री अशोक चव्हाण, महसूलमंत्री बाळासाहेब थोरात, कोल्हापूरचे पालकमंत्री सतेज पाटील, ग्रामविकासमंत्री हसन मुश्रीफ आणि मागण्यांशी संबंधित असलेल्या खात्यांचे मंत्री उपस्थित असणार आहेत.
प्रतिक्रिया
मुख्यमंत्री, उपमुख्यमंत्री यांनी चर्चेसाठी गुरुवारी येण्याचा आग्रह केला. त्यानुसार सकल मराठा समाजातील समन्वयकांशी चर्चा केली. त्यातील निर्णयानुसार या बैठकीसाठी मुंबईला जाण्याचा निर्णय घेतला आहे. माझ्यासमवेत सात समन्वयक असणार आहेत. मागण्यांबाबत सरकारने एक पाऊल टाकले असल्याने आम्ही चर्चेसाठी पाऊल पुढे टाकले आहे.
-खासदार संभाजीराजे