लोकमत न्यूज नेटवर्क
कोल्हापूर : कोरोनाच्या पार्श्वभूमीवर अखिल भारतीय शिवराज्याभिषेक महोत्सव समितीने यावर्षी शिवराज्याभिषेकदिनाचा सोहळा आज, शनिवारी आणि उद्या रविवारी दुर्गराज रायगडावर मोजक्या वीस जणांच्या उपस्थितीत साजरा करण्याचा निर्णय घेतला आहे. त्यानुसार या सोहळ्यासाठी कोल्हापूरचे हे मावळे शिवछत्रपतींचा जयजयकार करत शुक्रवारी सायंकाळी साडेपाचच्या सुमारास रवाना झाले.
जुना राजवाडा येथून खासगी बसमधून सोहळ्यासाठीचे आवश्यक साहित्य घेऊन हे मावळे रायगडकडे निघाले. त्यामध्ये महोत्सव समितीचे अध्यक्ष फत्तेसिंह सावंत, सदस्य संजय पवार, हेमंत साळोखे, विनायक फाळके, प्रसन्न मोहिते, सागर पाटील, राहुल शिंदे, राम यादव, सुखदेव गिरी, प्रवीण हुबाळे, सुजित जाधव, अजय पाटील, उदय बाेंद्रे, भरत कांबळे, दीपक सपाटे, दया हुबाळे, अमर जुगर, संतोष शिनगारे रवाना झाले. यावेळी उदय घोरपडे, बाबा महाडिक आदी उपस्थित होते. दरम्यान, गिरगाव (ता. करवीर) येथील चित्रकार युवराज जाधव यांनी शिवराज्याभिषेक सोहळ्यानिमित्त शिवछत्रपतींचे सिंहासनाधिष्ठित पाच फूट उंचीचे तैलचित्र साकारले आहे. त्याचे अनावरण युवराज्ञी संयोगिताराजे छत्रपती यांनी न्यू पॅॅलेस येथे केले. यावेळी चित्रकार जाधव, राम यादव, अभिजीत तिवले उपस्थित होते. चित्रकार जाधव हे तपोवन हायस्कूलमध्ये कलाशिक्षक आहेत. त्यांनी शिवछत्रपतींच्या समकालीन चित्रांचा अभ्यास करून हे तैलचित्र साकारले आहे. त्यासाठी त्यांना सहा महिने लागले.
----------------------------------
शिवभक्तांनी घरी सोहळा साजरा करावा
कोरोनाच्या संकटामुळे मोजक्या मावळ्यांच्या उपस्थितीत रायगडावर शिवराज्याभिषेक सोहळा साजरा होईल. खासदार संभाजीराजे यांनी केलेल्या आवाहनानुसार शिवभक्तांनी घरात राहून सोहळा साजरा करावा, असे फत्तेसिंह सावंत यांनी सांगितले.
----------------------------------
फोटो: ०४ कोल्हापूर ०२
कोल्हापुरात शुक्रवारी चित्रकार युवराज जाधव यांनी साकारलेल्या शिवछत्रपतींच्या तैलचित्राचे अनावरण युवराज्ञी संयोगिताराजे छत्रपती यांच्या हस्ते न्यू पॅॅलेस येथे झाले. यावेळी शेजारी डावीकडून अभिजीत तिवले, राम यादव, चित्रकार जाधव उपस्थित होते. (छाया : आदित्य वेल्हाळ)