वाघापूर : आदमापूर (ता. भुदरगड) येथील बाळूमामा हॉस्पिटलच्या इमारतीमध्ये २० बेडचे कोविड सेंटर रविवारी सुरू करण्यात आले. या कोविड सेंटरचे उद्घाटन भुदरगडचे उपविभागीय अधिकारी डॉ. संपत खिलारी यांंच्या हस्ते करण्यात आले. यावेळी प्रमुख उपस्थिती म्हणून देवस्थानचे अध्यक्ष धैर्यशील भोसले व कार्याध्यक्ष रामभाऊ मगदूम, राजाभाऊ माळी होते.
आदमापूर (ता. भुदरगड) येथील बाळूमामा ट्रस्टच्या व्यवस्थापकांसमवेत चर्चा करून येथील बाळूमामा हॉस्पिटलमध्ये कोरोना रुग्णांना २० ऑक्सिजन बेड शासकीय दरामध्ये रविवार (दि. २३ मे)पासून उपलब्ध होणार असल्याची माहिती आमदार प्रकाश आबिटकर यांनी दिली होती. त्यानुसार बाळूमामा हॉस्पिटलमध्ये २० ऑक्सिजन बेड, तर खासगी इमारतीमध्ये १८ बेड असे ३८ बेड असलेले कोविड सेंटर सुरू झाल्याने कोरोना रुग्णांसाठी हे उपयोगी ठरणार आहे. येथे डाॅ. विजय बंडगर आणि त्यांचे आरोग्यसेवक उपचार करणार आहेत.
यावेळी तालुका आरोग्य अधिकारी, पंचायत समितीचे भुदरगडचे डाॅ. सचिन यत्नाळकर, सरपंच विजयराव गुरव, राजाभाऊ माळी, सचिव रावसाहेब कोणकेरी, व्यवस्थापक अशोकराव पाटील, शंकरराव कुदळे, शिवाजी खतकर, एस. पी. पाटील, साताप्पा पाटील, राजेंद्र कांबळे, देवालयाचे कर्मचारी, आदी उपस्थित होते.
२३ आदमापूर कोविड सेंटर
फोटो ओळी :
आदमापूर (ता. भुदरगड) येथील बाळूमामा हॉस्पिटलच्या इमारतीमध्ये २० बेडच्या कोविड सेंटरचे उद्घाटन करताना भुदरगडचे उपविभागीय अधिकारी डॉ. संपत खिलारी, देवस्थानचे अध्यक्ष धैर्यशील भोसले, कार्याध्यक्ष रामभाऊ मगदूम, सरपंच विजयराव गुरव, आदी उपस्थित होते.