कोल्हापूर : जिल्हा क्रिकेट असोसिएशनचे खेळाडू विशांत मोरे व रणजित निकम यांची देशातील मानाच्या समजल्या जाणाऱ्या ‘मुश्ताक अली टी-२०’ स्पर्धेसाठी महाराष्ट्र राज्य संघात निवड झाली आहे.
यष्टीरक्षक असलेल्या विशांतने यापूर्वी राज्याच्या १४, १७ आणि १९ वर्षांखालील संघाचे प्रतिनिधित्व केले होते; तर २२ वर्षांखालील संघाचे कर्णधारपदही भूषविले होते. सलग दोन वर्षे त्याची २५ वर्षांखालील राज्य संघातही निवड झाली होती.
त्याने २०१५-१६ व २०१६-१७ या वर्षी महाराष्ट्र रणजी संघात स्थान मिळवले होते. राज्य संघात निवड झालेला दुसरा खेळाडू रणजितने २०१०पासून १६, १९, २३ वर्षांखालील संघातून व खुल्या गटातून जिल्हा संघाचे प्रतिनिधित्व केले आहे. सन २०१९मध्ये महाराष्ट्राच्या २३ वर्षांखालील राज्य संघातून खेळताना गुजरात, कर्नाटक, मध्यप्रदेश या संघांविरुद्ध त्याने सलग तीन सामन्यांत शतके झळकावली होती. याच कामगिरीच्या जोरावर त्याची गेल्या वर्षी राज्य रणजी संघात वर्णी लागली होती. विशांत व रणजित यांना जिल्हा क्रिकेट असोसिएशनचे अध्यक्ष चेतन चौगुले, उपाध्यक्ष रमेश हजारे, माजी अध्यक्ष बाळ पाटणकर, ऋतुराज इंगळे यांचे मार्गदर्शन मिळाले.
फोटो : २९१२२०२०-कोल-विशांत मोरे
फोटो : २९१२२०२०-कोल-रणजित निकम