लोकमत न्यूज नेटवर्क
कोल्हापूर : ‘कोजिमाशि’ पतसंस्थेने सभासदांना नववर्षाची भेट म्हणून नियमित कर्जाचा व्याजदर ११.५ टक्क्यांवरून ११ टक्के तर आकस्मिक कर्ज एक लाखापर्यंत करून त्याचा व्याजदर १० टक्के केल्याची माहिती पतसंस्थेचे तज्ज्ञ संचालक, शिक्षक नेते दादासाहेब लाड, संस्थेचे अध्यक्ष कैलास सुतार व उपाध्यक्ष सुभाष पाटील यांनी पत्रकातून दिली.
कर्ज कपात साडेपाच टक्क्यांवरून साडेतीन टक्के केला आहे. संस्थेने १ एप्रिल २०२० पासून आतापर्यंत १ कोटी २५ लाख रुपये सभासदांचे कर्जमाफ केले. नोव्हेंबर २०२० अखेर कोरोनाबाधित सभासदांना संस्थेच्यावतीने पाच हजार रुपये मदत देणार आहे. शिक्षक नेते दादासाहेब लाड यांच्या नेतृत्वाखाली पतसंस्थेचा कारभार राज्यात लाड यांच्या नेतृत्वाखाली ‘स्वाभिमानी’ आघाडीची सत्ता २००४ मध्ये आली, यावेळी ३२ कोटींच्या ठेवी, कर्जाचा १७ टक्के व्याजदर होता. आता ४५० कोटींच्या ठेवी आणि ११ टक्के कर्जाचा व्याजदर ठेवून सभासद हित जोपासले आहे. विमा कंपन्यांच्या सहकार्याशिवाय ८.७५ कोटींची कर्जमाफी करत २१ ते २५ टक्के लाभांशही दिला आहे. पतसंस्थेच्या मागील निवडणुकीत विविध संघटनांना एकत्र आल्या तरी दादासाहेब लाड यांनी हॅट्‌ट्रिक केली. पुणे शिक्षक मतदारसंघातून कोल्हापूरचा आमदार व्हावा आणि पालकमंत्री सतेज पाटील यांचा ‘शब्द’ प्रमाण मानून त्यांनी माघार घेऊन आघाडीच्या उमेदवाराच्या विजयात सिंहाचा वाटा उचलला. पतसंस्थेच्या आगामी निवडणुकीत सभासदांच्या पाठबळावर ‘स्वाभिमानी’ आघाडी यशस्वी होईल, असे अध्यक्ष सुतार व उपाध्यक्ष पाटील यांनी म्हटले आहे.