अशोक पाटील --इस्लामपूर --इस्लामपूरचे नूतन नगराध्यक्ष निशिकांत पाटील यांनी पदभार स्वीकारला असून, त्यांनी उपनगराध्यक्ष आणि सभापती निवडीसाठीची सभा ४ जानेवारीला बोलावली असल्याचे समजते. त्यापूर्वीच आमदार जयंत पाटील यांनी अपक्ष दादा पाटील यांच्यासह राष्ट्रवादीचे १४ नगरसेवकांना अज्ञातस्थळी पाठवले आहे. पहिल्याच सभेत उपनगराध्यक्षपद आणि सभापतीपदे राष्ट्रवादीकडे खेचण्यासाठी राजकीय खेळ्या सुरू आहेत.विकास आघाडीचे नूतन नगराध्यक्ष निशिकांत पाटील यांनी सोमवार, दि. २६ डिसेंबररोजी गाजावाजा करून नगराध्यक्ष पदाचा कार्यभार स्वीकारला. आता ते पहिल्या सर्वसाधारण सभेची विषयपत्रिका काढणार असल्याचे वृत्त आहे. ४ जानेवारीरोजी ही सभा होणार असल्याचे समजते. त्या अगोदर आमदार पाटील यांनी राष्ट्रवादीतील १४ नगरसेवक आणि अपक्ष दादा पाटील यांना पर्यटनासाठी अज्ञातस्थळी पाठवले आहे. या खेळीमध्ये राष्ट्रवादी यशस्वी झाल्यास उपनगराध्यक्ष आणि सर्व सभापतीपदे राष्ट्रवादीकडे जाणार आहेत.निशिकांत पाटील सध्या वैद्यकीय संकुलात बसून महाआरोग्य शिबिराचे नियोजन करत आहेत. हे शिबिर बुधवारी होत आहे. हा कार्यक्रम यशस्वी केल्यानंतरच ते पालिकेतील पहिल्या सभेची विषयपत्रिका काढणार आहेत. राष्ट्रवादीकडे १४ नगरसेवक आहेत. एकमेव अपक्ष असलेले दादा पाटील त्यांना सामील झाल्यास सदस्यसंख्या १५ होते, तर विकास आघाडीकडे नगराध्यक्षांसह कपबशी चिन्हावर निवडून आलेले नऊ व शिवसेनेचे पाच असे एकूण १४ सदस्य आहेत. शिवसेनेच्या आनंदराव पवार यांनी उपनगराध्यक्ष पदावर दावा केला आहे. त्यामुळे कोणत्या राजकीय घडामोडी होणार, याबाबत तर्कवितर्क लढवले जात आहेत.कोण काय म्हणाले?इस्लामपूर शहरातील जनतेने परिवर्तनाला साथ दिली आहे. राष्ट्रवादीच्या नेत्यांना माझे आवाहन आहे. इस्लामपुरातील नागरिकांच्या मतांचा विचार करून विकास आघाडीला सहकार्य करावे. आम्ही त्यांच्या सहकार्याने शहराचा विकास करू.- निशिकांत पाटील, नगराध्यक्ष, इस्लामपूर नगरपालिकाइस्लामपुरात पालिका निवडणुकीत नगराध्यक्षपदाचे उमेदवार पराभूत झाले असले तरी, आमचे जास्त नगरसेवक निवडून आले आहेत. त्यांना विकास आघाडीपेक्षा जास्त मते आहेत. आमचा ‘कार्यक्रम’ थोडा बिघडला असला तरी, तो आगामी काळात दुरुस्त करू.- जयंत पाटील, आमदार.
इस्लामपूर उपनगराध्यक्ष, सभापतीपदे राष्ट्रवादीकडे?
By admin | Updated: December 28, 2016 00:42 IST