कोल्हापूर : जिल्ह्याला दिवसेंदिवस कोरोनाचा विळखा वाढत असून गुरुवारी सायंकाळपर्यंत कोरोना रुग्णांवरील उपचारासाठीचे शासकीय रुग्णालयातील आयसीयु बेड संपले आहेत. खासगी रुग्णालयातील चार बेड शिल्लक होते. ऑक्सिजनचे मात्र २३९ बेड उपलब्ध होते. सध्या वॉर रूमकडे आयसीयु बेडचीच विचारणा होत असून ते मिळत नाहीत, अशी स्थिती आहे. त्यामुळे प्रत्येक रुग्णालयांनी हे बेड वाढविण्याची गरज आहे.
जिल्ह्यात सध्या कोरोना संसर्गाची दुसरी लाट सुरू असून बुधवारी कोरोनाबाधितांचा आकडा १५०० च्या पुढे गेला होता. त्यात अनेक रुग्ण परिस्थिती गंभीर बनल्यानंतरच रुग्णालयात येत असल्याने आयसीयु बेडची संख्या अपुरी पडत आहे. रुग्णांना बेडची माहिती मिळावी यासाठी जिल्हा प्रशासनातर्फे वॉर रूम सुरू करण्यात आली असून येथून २४ तास सेवा दिली जात आहे. जिल्ह्यातील सर्व रुग्णालयांतील सर्व बेड्‌सची माहिती येथे एकत्रित केली जाते व डॅश बोर्डवर टाकली जाते. त्यामुळे नातेवाईकांना त्याक्षणी कोणत्या रुग्णालयात किती व कोणते बेड शिल्लक आहेत, याची त्वरित माहिती मिळते.
वॉर रूमला रोज बेडच्या चौकशीसाठी अंदाजे दोनशेच्या आसपास फोन येतात. त्यापैकी किमान ५० फोन हे आयसीयु बेडसाठी असतात. त्यानंतर विचारणा होते ती ऑक्सिजन बेडची. नॉन ऑक्सिजन बेडसाठी फार कमी प्रमाणात चौकशी होते.
---
बेडची स्थिती (गुरुवारी सायंकाळी ६ वाजेपर्यंतची)
बेडचा प्रकार : उपलब्ध बेड
खासगी : शासकीय
आयसीयु : ०४ : ००
ऑक्सिजन : ११४ : १२५
नॉन ऑक्सिजन : २६८ : ६५०
एकूण : ३८६ : ७७५
--
माहिती येथून मिळवा
कोविड कोल्हापूर डॉट कॉम या वेबसाईटवर बेड मॅनेजमेंट डॅश बोर्डवर क्लिक केले की, शासकीय-खासगी रुग्णालयांतील आयसीयु, ऑक्सिजन व नॉन ऑक्सिजन बेड्‌सची माहिती मिळते. याशिवाय तुम्ही वॉर रूममधील ९३५६७१६५६३, ९३५६७३२७२८, ९३५६७१३३३० या नंबरवर फोन करू शकता.
--
क्षणा-क्षणाला बदल
रुग्णालयातील एखाद्या रुग्णाला डिस्चार्ज मिळाला किंवा त्याचा मृत्यू झाला की, उपलब्ध असलेल्या व्हेंटिलेटर बेडवर त्याच रुग्णालयातील गंभीर रुग्णाला शिफ्ट केले जाते. त्यामुळे तासाभरापूर्वी रुग्णालयात आयसीयु बेड शिल्लक दिसत असेल, तर नंतर तो भरलेला असताे. वॉर रूमकडे चौकशीच इतक्या मोठ्या प्रमाणात होते की, कुणाला बेड द्यायचा हा प्रश्न येतो. त्यामुळे फोन आला की, रुग्णाचे नाव, पत्ता व ऑक्सिजन लेवलची नोंद केली जाते. त्यापैकी अतिगंभीर रुग्णाच्या नातेवाईकांना फोन केला जातो.
--