दीड लाखाचा ‘नरक्या’ जप्त हणबरवाडी येथे तिघे ताब्यात : भुदरगड पोलिसांचा छापा

 गारगोटी : भुदरगड तालुक्यातील हणबरवाडी येथे भुदरगड पोलिसांनी छापा टाकून नरक्या वनस्पतीची २१ पोती जप्त केली. भारतीय बाजारपेठेत याची किंमत सुमारे दीड लाख रुपये आहे. या प्रकरणी पोलिसांनी तिघांना ताब्यात घेतले आहे. अभिषेक प्रवीण पाटील, सागर शिवाजी पाटील, भिवा संतू पाटील (सर्व रा. हणबरवाडी) अशी तिघांनी नावे आहेत. कर्करोगावर सर्वांत उपयुक्त ठरणारी नरक्या वनस्पती भुदरगडच्या जंगलात विपुल प्रमाणात आढळते. वनखात्याच्या हातावर तुरी देऊन अनेक वेळा या वनस्पतीची मोठ्या प्रमाणात तस्करी होत असते. भारतीय आणि आंतरराष्ट्रीय बाजारपेठेत नरक्या ऊर्फ अमृता या वनस्पतीला मोठी मागणी असते. तिचे दरही लाखोंच्या पटीत वाढत असतात. गारगोटी परिसरात नरक्या वनस्पतीचा साठा असल्याची कुणकुण पोलीस उपनिरीक्षक विष्णू गायकवाड यांना लागली. आठवडाभर पाळत ठेवून उपनिरीक्षक राजेश राठोड यांच्या मार्गदर्शनाखाली पथकाने भिवा संतू पाटील यांच्या घरावर छापा टाकला. यावेळी घरामागे नरक्या वनस्पतीने भरलेली २१ पोती आढळून आली. यामध्ये नरक्या वनस्पतीचे ५०६ किलो तुकडे आढळून आले. पोलिसांनी वनपाल चंद्रकांत नगारे, संजय भाट, आर. पी. बर्गे यांना पाचारण करून या वनस्पतीबाबत खात्री करून घेतली. पोलिसांनी जोरदार तपास मोहीम राबवून अभिषेक पाटील, सागर पाटील, भिवा पाटील (रा. हणबरवाडी) यांना ताब्यात घेतले आहे. याप्रकरणी भुदरगड पोलिसांत गुन्हा नोंद झाला असून, पोलीस निरीक्षक बन्सी बारवकर यांच्या मार्गदर्शनाखाली वसंत पिंगळे, संजय मेटकर, धोंडिराम शिंदे, राजू सूर्यवंशी, हणमंत नाईक, आर. टी. जरग अधिक तपास करीत आहेत. (प्रतिनिधी)