कडगाव/गजानन देसाई
: लग्न म्हणजे अवाढव्य खर्च, आलिशान मंडप, हॉलचे बुकिंग, जथे, जेवणावळी, आहेर, पै-पाहुण्यांचा रूसवा-फुगवा, वरातीतील आतषबाजी, डीजेची यंत्रणा, मित्र-मंडळींच्या खर्चासाठी हातावर ठेवलेली पाकिटे आणि यातून लागणारी खिशाला कात्री. साध्या लग्नसमारंभासाठी सर्वसामान्य कुटुंबीयांचा एक ते दोन लाख तर श्रीमंतांचा २५ ते ३० लाख असा खर्चाचा अंदाज. एखाद्या लग्न सोहळ्यातील हे नेहमीचे चित्र. कोरोनाच्या दणक्याने हा खर्च आटोक्यात आलाय, हे मात्र नक्की.
मात्र लग्नातील खर्चाची रक्कम तेवढी, पण ती विधायक कामाला वापरण्याचे काम काही जणच करतात. अशाप्रकारे लग्नातील खर्च टाळून गावातील प्राथमिक शाळेच्या इमारतीसाठी मदत करण्याचे स्तुत्य कार्य कडगाव (ता.भुदरगड) येथील देसाई बंधूंनी केले आहे. परिसरातून त्यांचे कौतुक होत आहे.
विद्या मंदिर कडगाव ही केंद्रशाळा परिसरातील नावाजलेली शाळा. येथील माळीतले देसाई सरकार यांनी आपली कोट्यवधी रुपयांची जागा शाळेसाठी देऊ करून गावच्या वैभवात भर घातली. अनेक विद्यार्थी या शाळेने घडवले. मुलांना शिष्यवृत्तीमध्ये यश मिळवून दिलं. अलीकडे सुसज्य अशी शाळेची नवीन इमारत उभी झाली. शंभर टक्के बोलक्या भिंती, स्मार्ट वर्ग, डिजिटल वर्ग, ज्ञान रचनावादी शिक्षण, अनेक कृतीयुक्त उपक्रम राबवण्यासाठी व शाळा सुशोभिकरणासाठी मुख्याध्यापक डी.के.सावंत, शाळा व्यवस्थापन समिती व सर्व शिक्षक यांनी शालेय उठावासाठी ग्रामस्थांना आवाहन केले. मेडिकल व्यवसायामध्ये कार्यरत असणारे राहुल देसाई यांनी आपले छोटे बंधू युवराज देसाई यांच्या लग्न समारंभास येणाऱ्या खर्चाला फाटा देत शाळेस मदत करण्याचा निर्णय घेतला. शाळेस ५५, ५५५ रुपयाची भरीव मदत देऊ केली आणि या प्रसंगी अनेक माझी विद्यार्थ्यांना शाळेस मदत करण्याचे आवाहन केले.
यावेळी मुख्याध्यापक डी. के.सावंत, शाळा व्यवस्थापन समितीचे अध्यक्ष राजेंद्र देसाई, अवधूत देसाई, सविता देसाई, नेहा देसाई, प्रकाश देसाई , प्रकाश पाटील, पांडुरंग देसाई, गजानन देसाई, सुरेश जाधव, रॉबिन डिसोझा, सिद्धेश देसाई, सुशांत कासार, अमोल डेळेकर उपस्थित होते.
फोटो : शाळेसाठी मदतीचा धनादेश मुख्याध्यापक डी. के.सावंत शाळा व्यवस्थापन समिती अध्यक्ष राजेंद्र देसाई यांच्याकडे देताना नवदाम्पत्य चि. युवराज व चि. सौ. का.कोमल,पांडुरंग देसाई,राहुल देसाई व अन्य.