तडकाफडकी बदली : सीईओंची कारवाई, माहिती अधिकारातून निष्पन्न
दत्ता पाटील
म्हाकवे : आर्थिक अडचणी असतानाही गावकरी घरफाळा आणि पाणीपट्टी भरतात. या देवघेवीची जबाबदारी ग्रामसेवकांवर असते. मात्र, सोनगे (ता. कागल) येथील ग्रामसेविका स्मिता जाधव यांनी या निधीवरही डल्ला मारला आहे. एकाच महिन्यात दिवाबत्तीवर १७ हजार, पाणी योजनेच्या लिकेजवर (गळती) वारेमाप खर्च, आठवडाभरात कर्मचाऱ्यांना दोनवेळा बोनस वाटप, आवश्यक साहित्य खरेदीचे धनादेश हे संबंधित दुकानदार, फर्म अथवा कंपनीच्या नावे न काढता ते आपल्याच ग्रामपंचायत कर्मचाऱ्यांच्या नावे काढले आहेत. ग्रामनिधी व नपापु यामध्ये अनेक कारभारात भ्रष्टाचार केला आहे.
माजी उपसरपंच जयसिंग पाटील यांनी माहिती अधिकारातून घेतलेल्या माहितीतून हा सावळागोंधळ निष्पन्न झाला आहे. याची दखल घेत मुख्य कार्यकारी अधिकारी डॉ. अमन मित्तल यांनी जाधव यांची करवीर येथे तडकाफडकी बदली केली आहे. वर्षांपूर्वी जाधव या सोनगे येथे हजर झाल्या आहेत. मात्र, त्यांच्या यापूर्वीच्या कारभाराबाबत पाटील यांना कुणकुण होती. त्यामुळे त्यांच्या कारभारावर ते लक्ष ठेवून होते. थोडी शंका आल्याने त्यांनी माहिती अधिकारातून माहिती मागितली. यामध्ये त्यांना बराच अनागोंदी कारभार दिसून आला. १९ ऑक्टोबर२० रोजी पं. स.चे विस्तार अधिकारी कुंभार तसेच गटविकास अधिकारी संसारे यांच्याकडे लेखी तक्रार केली. मात्र, त्यांनी उडवाउडवीच केली. त्यामुळे २७ ऑक्टोबर रोजी उपमुख्य कार्यकारी अरुण जाधव यांच्याकडे तक्रार केली. मात्र, याबाबत कार्यवाहीचा पत्ताच नाही. त्यामुळे पाटील यांनी थेट मुख्य कार्यकारी अधिकारी डॉ. अमन मित्तल यांच्याकडे १२ डिसेंबरला दाद मागितली होती.
डॉ. मित्तल यांनी याची गांभीर्याने दखल घेत ग्रामसेविका जाधव यांची तडकाफडकी बदली केली. मात्र, तक्रारदार पाटील हे या कारवाईबाबत समाधानी नाहीत. त्यामुळे त्यांनी वरिष्ठांकडे दाद मागण्याचा निर्धार केला आहे.
चौकट-
निलंबन होईपर्यंत पाठपुरावा करणार : पाटील
ग्रामसेवक हा गावाचा रखवालदार असतो. त्यामुळे रखवालदारानेच भ्रष्टाचार करणे ही खेदजनक बाब आहे. याबाबत मुख्य कार्यकारी अधिकारी यांनी त्यांची तात्काळ बदली केली. मात्र, हा गंभीर प्रकार असून संबंधित ग्रामसेविका निलंबित होईपर्यंत पाठपुरावा करू. तसेच विभागीय आयुक्त पुणे यांच्याकडे दाद मागणार असल्याचे जयसिंग पाटील यांनी सांगितले.
दिवाबत्तीवर १७ हजार खर्च कसा?
गावातील केवळ सार्वजनिक खांबांवरील खराब तारा अथवा खांब बदलण्याची जबाबदारी वीज कंपनीची असते. केवळ बल्ब गेला असेल तरच ग्रामपंचायतीने तो बल्ब घालावयाचा असतो. असे असतानाही मार्च २० मध्ये एकाच महिन्यात १७ हजार खर्च दाखविला असल्याचे जयसिंग पाटील यांनी सांगितले.