कोल्हापूर : घरफाळा घोटाळ्यातील खरा ‘मास्टरमाईंड’ संजय भोसलेच आहे, असा माणूस पालिकेच्या सेवेत राहणे घातक असून, त्यांच्यावर तातडीने फौजदारी गुन्हा दाखल करून सेवेतून बडतर्फ करावे, अशी मागणी माजी उपमहापौर भूपाल शेटे यांनी पत्रकार परिषदेत केली.
गेल्या अनेक वर्षांत झालेल्या घरफाळा घोटाळ्याचा खरा सूत्रधार भोसलेच आहे. कर निर्धारक असताना भोसले याने महापालिकेचे कोट्यवधीचे नुकसान होईल असे मोठे फेरफार केले असल्याचा दावा शेटे यांनी केला.
निलंबित अधीक्षक अनिरुद्ध शेटे निर्दोष असताना त्यांच्यावर खोटा गुन्हा दाखल केला. हा मानसिक धक्का सहन न झाल्यामुळे शेटे आजारी पडले आणि त्यातच त्यांचे निधन झाले. त्यांची तसेच त्यांच्या परिवाराची नाहक बदनामी झाली. म्हणूनच शेटे यांच्या मृत्यूस जबाबदार म्हणून संजय भोसले याच्यावर सदोष मनुष्यवधाचा गुन्हा दाखल करावा, अशी मागणीही त्यांनी केली.
सहायक आयुक्त विनायक औंधकर यांनी केलेली चौकशी अत्यंत पारदर्शक व परिपूर्ण असल्याचे सांगून त्यांनी दिलेल्या माहितीनुसार आता घोटाळ्यात सहभाग असलेल्या संजय भोसले, दिलीप कोळी, शशिकांत पाटील, बापू माने या चौघांवर तातडीने गुन्हा दाखल करावा, असे शेटे यांनी म्हटले आहे.
अनिरुध्द शेटे निर्दोष असल्याचा दावा-
घरफाळा घोटाळ्यातील चौदापैकी आठ प्रकरणांची चौकशी झाली. त्यातील पाच प्रकरणांत दिवाकर कारंडेसह संजय भोसले दोषी आहेत; परंतु त्यांनी आपले नाव पद्धतशीरपणे बाजूला काढले होते. अधिकाऱ्यांवर दबाव आणला होता. अनिरुद्ध शेटे यांना ज्या प्रकरणात दोषी ठरवून त्यांच्याविरोधात गुन्हा दाखल केला, त्या प्रकरणात नुकसानच झालेले नसून, अनिरुद्ध शेटे निर्दोष असल्याचे सांगण्यात आले.