कोल्हापूर : एक माजी आमदार व त्यांच्या कार्यकर्त्यांच्या दहशतीमुळे सीपीआरमधील महिला डॉक्टरने थेट नोकरीचाच राजीनामा दिल्यामुळे या ठिकाणच्या कारभाराची पुन्हा चर्चा सुरू झाली आहे. एकीकडे आरोग्य क्षेत्रात सीपीआर आणि राजर्षी शाहू छत्रपती शासकीय वैद्यकीय महाविद्यालय उत्तम कामगिरी बजावत असताना, राजकीय व्यक्तींच्या हस्तक्षेपामुळे सीपीआरची बदनामी होत असल्याची चर्चा आहे.
या महिला डॉक्टरांनी सप्टेंबरमध्येच राजीनामा दिला होता. परंतु कोरोनाच्या परिस्थितीमुळे तो स्वीकारण्यात आला नव्हता. या राजीनामा पत्रामध्ये या डॉक्टरांना थेट माजी आमदार आणि त्यांचाच कार्यकर्ता असलेल्या माजी उपमहापौर यांच्या नावाचा उल्लेख केला आहे. त्यांच्याकडून होणाऱ्या त्रासाला कंटाळून राजीनामा देत असल्याचे या पत्रात म्हटले आहे. या माजी आमदाराचे व महिला डॉक्टरचे पती असलेल्या डॉक्टरचे अगोदरही विविध कारणांवरून वाद आहेत. त्यांच्या विधानसभा निवडणुकीतही हा मुद्दा चर्चेत आला होता. गेल्याच महिन्यात माजी आमदारांच्या कार्यकर्त्यांने त्यांच्या रुग्णालयाच्या दारात आंदोलन केले होते. तो राग सीपीआरमध्ये काढला जात असल्याची चर्चा आहे. सीपीआरमध्ये अनेक राजकीय नेते, कार्यकर्ते पातळी सोडून डॉक्टर आणि कर्मचाऱ्यांना सेवा देण्यासाठी फोन करण्यापासून ते इशारे देण्यापर्यंत दहशत दाखवतात. सीपीआरच्या विविध विभागांच्यावतीने उल्लेखनीय काम सुरू असताना, अशा प्रकारांमुळे सीपीआर चर्चेत येत आहे.
चौकट
माजी उपमहापौरांची सीपीआरला भेट
महिला डॉक्टरांनी राजीनामा पत्रात ज्यांच्या नावाचा उल्लेख केला आहे, अशा माजी उपमहापौरांनी बुधवारी सीपीआरला भेट दिली. त्यांनी या ठिकाणी काही मागील प्रकारांची चौकशी केल्याचे समजते.