अनिल पाटील
सरूड : आजरा तालुक्यापाठोपाठ शाहूवाडी तालुक्यातही काळ्या भाताच्या (तांदळाच्या) शेतीचा प्रयोग करण्यात येत आहे. शाहूवाडी तालुक्यातील सोनवडे येथील प्रगतिशील शेतकरी गुरुनाथ शिंदे यांनी प्रथमच २० गुंठे क्षेत्रावर काळ्या भाताची पेरणी केली आहे. काळ्या भाताच्या लागवडीचा तालुक्यातील हा पहिलाच प्रयोग आहे.
औषधी गुणधर्म तसेच खाण्यासाठी अत्यंत उपयुक्त असणाऱ्या ‘चाकहो’ नावाच्या या वैशिष्ट्यपूर्ण काळ्या भाताची लागवड कोल्हापूर जिल्ह्यातील आजरा तालुक्यामधील शेतकऱ्यांबरोबरच शाहूवाडी तालुक्यातील सोनवडे येथील गुरुनाथ शिंदे यांनीही केली आहे. काळा तांदूळ वैशिष्ट्यपूर्ण व औषधी असल्यामुळे बाजारात त्याला चांगली मागणी आहे.
यासाठी शिंदे यांनी माळरानावरील वीस गुंठे जमिनीची निवड करून त्यामध्ये आसामहून या भाताचे सात किलो बियाणे मागवून धूळवाफेतील पेरणी केलेली आहे.
या काळ्या भातामध्ये औषधी गुणधर्म असून हा काळा तांदूळ कार्डियो वेस्कूलर व कर्करोगावर उपायकारक असून, मधुमेही रुग्णांसाठी लाभदायी आहे. कोलेस्टेरॉलवर नियंत्रण, तसेच बद्धकोष्ठता व पचन संस्थेचे संबंधित तक्रारी दूर होणे, मेंदू व डोळ्यांसाठी उत्तम व लठ्ठपणासाठी उपयुक्त असा हा तांदूळ आहे. आणखी इतरही औषधी गुणधर्म या तांदळाचे आहेत.
कोट...
अनेक प्रयत्नांनी हे भात बियाणे मिळवले असून, सोनवडे गावामध्ये मी वीस गुंठ्यात याचा प्रयोग केला आहे. हा प्रयोग यशस्वी झाल्यास पुढील वर्षी या शेतातील पिकलेल्या भाताची तपासणी करून ते बियाणे म्हणून या भाताची लागवड करू इच्छिणाऱ्या या भागातील सर्व शेतकऱ्यांना पुरवठा करणार आहे.
-गुरुनाथ शिंदे, प्रगतिशील शेतकरी, सोनवडे