मंगलमूर्ती-क्लॅक्स सोल्युशनमध्ये आज अंतिम लढत

मंगलमूर्ती संघाने बुधवारी फुलेवाडी क्रिकेट क्लबचा ३० धावांनी पराभव केला. प्रथम फलंदाजी करताना मंगलमूर्ती संघाने ४० षटकांत सर्वबाद १९४ धावा केल्या. त्यात रणजित माने याने ६२, सुरेश सातपुते याने ३५, शैलेश थोरात याने २९, राहुल माने याने १४, वैभव नलवडे व सखाराम माळी यांनी प्रत्येकी १२ धावा केल्या. गोलंदाजी करताना फुलेवाडीकडून सुशांत साळोखेने ६, शरद राबाडेने दोन, अमाेल पाटील व संदीप महाडिक यांनी प्रत्येकी एक बळी घेतला. उत्तरादाखल खेळताना फुलेवाडी संघाचा सर्व संघ ३६.१ षटकांत १६४ धावांत आटोपला. त्यामुळे हा सामना मंगलमूर्तीने ३० धावांनी जिंकत स्पर्धेची अंतिम फेरी गाठली. त्यात अजय सावंत ३६, अभिजित मोरे, बाबासाहेब गवळी यांनी प्रत्येकी २२ धावा केल्या. सुजित मगर याने २० धावा केल्या. गोलंदाजी करताना मंगलमूर्तीकडून अनिल माळी सुरेश सातपुतेने वैभव नलवडे, प्रकाश सातपुते यांनी भेदक गोलंदाजी करत विजय संपादनास हातभार लावला. तत्पूर्वी क्लॅक्स सोल्युशन मयूर स्पोर्टस्‌ने फायटर्स ‘ब’ चा पराभव करून अंतिम फेरी गाठली आहे. त्यामुळे या दोन संघांत आज, गुरुवारी अंतिम लढत होत आहे.