सादिक नगारसे। हलकर्णी
तुम्हाला काय होतंय...किरकोळ आजार आहे... या गोळ्या घ्या, आराम करा, काळजी घ्या.. गरज पडली तर परत या.. हे आपुलकीचे शब्द आहेत हलकर्णीत सेवा करणाऱ्या खासगी डॉक्टरांचे. संपूर्ण तपासणी, काय होतंय याची आपसूक चौकशी, बी. पी., ऑक्सिजन तपासणी करून, काय नाही, आराम करा, बाहेर फिरू नका हा मौलिक सल्ला ६० रुपयांच्या माफक दरात तेही इंजेक्शन दिल्यास दिला जातोय. ना कोणती लुबाडणूक...ना कोणती संधी साधून पैसा कमावण्याची लालसा. निव्वळ सेवा देणे हे व्रत घेतलेले हलकर्णी परिसरातील खासगी डॉक्टर रुग्णासाठी देवदूत ठरत आहेत.
मे महिन्यात साधारण तीन ते साडेतीन हजार इतक्या सौम्य व मध्यम स्वरूपाच्या रुग्णांवर येथील डॉक्टरांनी उपचार करून त्यांना बरे केले आहे.
गंभीर रुग्णांना उपजिल्हा रुग्णालय व अन्य तज्ज्ञांकडे जाण्याचा सल्ला देत आहेत. त्यांना बरे करण्यात आपले योगदान दिल्याने या डॉक्टरांवरील विश्वास अधिक दृढ झाला आहे. वेळ पडल्यास आपल्याकडील उपलब्ध जागेत या रुग्णांना एका दिवसासाठी दाखल करून त्यांना बरे करण्यावर भर दिला जात आहे. त्यामुळे आपआपल्या रुग्णालयात सेवा देणारी ही १० डॉक्टरांची टीम भागासाठी वरदान ठरली आहे. हलकर्णीसह परिसरात कोरोना रुग्णसंख्येत मोठी वाढ झाली. त्यातील काहीजण दगावले. अशा बिकट परिस्थितीत किरकोळ व अन्य आजाराने त्रासलेले रुग्ण शक्यतो उपचार घेण्यासाठी धजावत आहेत. अशा गोंधळलेल्या व भयभीत झालेल्या रुग्णांवर त्यांचा गैरसमज दूर करून त्यांच्यावर उपचार करून त्यांना आजार अंगावर न काढण्याच्या व कधीही फोन करून सल्ला येथील डॉक्टर देत आहेत.
* हे डॉक्टर आहेत सेवेत! सुभाष हत्तरकी, सुरेश हत्तरकी, अमृत धबाले, कृष्णकांत सावंत, किरण मराठे, श्रीधर चव्हाण, प्रवीण बालनाईक, श्रवण आरबोळे, गुंडूराव पाटील, मेघनाथ महाडिक.
-----
धोका आहे.. सुट्टी नाहीच.... वातावरणातील बदलामुळे अचानक सर्दी, खोकला, ताप यासह उलटी, जुलाब आदी रुग्णांत वाढ झाली आहे. कोरोनाच्या पहिल्या लाटेत यातील ३ डॉक्टरांनी कोरोनावर मात केली. तरीही सेवेत त्यांनी खंड पडू दिला नव्हता. यावेळीही मोठा धोका पत्करून हे देवदूत सेवा देत आहेत. हलकर्णी हे परिसरातील १० दवाखाने असलेले मोठे गाव आहे. त्यामुळे मे महिन्यातील रविवारची व कधी-कधी रोजच्या जेवणाची सुट्टी रद्द करून येथील डॉक्टर सेवा देत आहेत.
---------------------------