मुरगूड : डोंगर पठारावरून वैरण आणताना भारा मानेवर पडून यमगे (ता. कागल) येथील नामदेव दत्तात्रय मिसाळ (५०) यांचा मृत्यू झाला. घटनेची नोंद मुरगूड पोलीस स्टेशनमध्ये झाली आहे. किरण पाटील यांनी याबाबत वर्दी दिली. दररोजच्या वाटेवर पावसामुळे निसरट झाल्यामुळे ही दुर्घटना घडली.
यमगे येथील नामदेव मिसाळ हे महादेव पाटील यांच्या बरोबर दररोज अंबाबाई मंदिराजवळ वैरण आणण्यासाठी जातात. शनिवारी सकाळी दोघे पठारावर गेले होते. नामदेव यांनी सुरुवातीला एक वैरणीचा भारा आणला. अंबाबाई मंदिराच्या आवारात ते गवत टाकून दुसरा भारा आणण्यासाठी पुन्हा ते पठारावर गेले. यावेळी खाली उतरताना त्यांच्या पुढे महादेव पाटील होते. दररोजच्या वाटेने येत असताना त्यांचा पाय निसटला आणि ते खाली पडले. यावेळी वैरणीचा भारा त्यांच्या अंगावर पडून त्यांच्या मानेला हिसका बसला. जखमी नामदेव यांना महादेव व इतर नातेवाइकांनी मुरगूड ग्रामीण रुग्णालयात आणले. पण वैद्यकीय अधिकाऱ्यांनी त्यांचा मृत्यू झाल्याचे सांगितले. सांयकाळी त्यांच्या मृतदेहावर शोकाकुल वातावरणात अंत्यसंस्कार करण्यात आले. नामदेव मिसाळ हे येथील शाहू दूध संस्थेत संचालक होते. होमगार्ड महेश मिसाळ यांचे ते वडील होत. त्यांच्या पश्चात पत्नी, दोन मुले, भाऊ असा परिवार आहे.
११ नामदेव मिसाळ डेड