कोल्हापूर : राज्यभर ऑक्सिजनचा तुटवडा भासत असतानाच ऑक्सिजनअभावी कोल्हापुरात रंकाळा टॉवर परिसरातील महालक्ष्मी हॉस्पिटलमध्ये कोरोनाग्रस्त माजी सैनिकाचा तडफडून मृत्यू झाला. सर्जेराव पांडुरंग कुरणे (वय ४१ रा. गिरगाव, ता. करवीर) असे त्या दुर्दैवी माजी सैनिकाचे नाव आहे. ही घटना शनिवारी (दि. १ मे) सकाळी घडली. हॉस्पिटल प्रशासनाने वेळेवर ऑक्सिजन पुरवला नसल्याने रुग्णाचा मृत्यू झाल्याचा आरोप त्याच्या नातेवाइकांनी केला.
कोरोनामुळे कोल्हापूर जिल्ह्यात नव्या रुग्णांची संख्या वाढत आहे. जिल्ह्याचे पालकमंत्री सतेज पाटील यांनी जिल्ह्याला ऑक्सिजनची कमतरता भासणार नसल्याचा विश्वास दिला असताना दुसरीकडे काही वेळातच हॉस्पिटलमध्ये ऑक्सिजनअभावी कोरोना रुग्णाचा मृत्यू झाल्याचे समोर आले.
गिरगाव येथील माजी सैनिक सर्जेराव कुरणे यांना कोरोनाचा संसर्ग झाल्याने त्यांना दि. २६ एप्रिल रोजी सकाळी आयसोलेशन हॉस्पिटलमधून महालक्ष्मी हॉस्पिटलमध्ये दाखल केले. शनिवारी सकाळी त्यांंना जोडलेला ऑक्सिजन संपला, रुग्णाने ऑक्सिजनअभावी दम लागत असल्याचे हॉस्पिटलमधील कर्मचाऱ्यांना सांगितले. कर्मचाऱ्यांनी त्याकडे दुर्लक्ष केले. संबंधित रुग्णाची तडफड सुरू झाल्यानंतर कर्मचाऱ्यांची ऑक्सिजन आणण्यासाठी धावाधाव केली. सुमारे ४० मिनिटांनी ऑक्सिजन सिलिंडर आणले. तोपर्यंत त्यांचा मृत्यू झाल्याची तक्रार त्यांच्या नातेवाइकांनी केली.
घटनेचे गांभीर्य ओळखून महापालिकेचे उपायुक्त निखिल मोरे हे पथकासह हॉस्पिटलमध्ये आले. त्यावेळी रुग्णाच्या नातेवाइकांनी हॉस्पिटलसमोर काही काळ गोंधळ घातला. पोलिसांनीही हॉस्पिटल आवारात बंदोबस्त ठेवला होता.
ऑक्सिजन जोडणीत हलगर्जी : उपायुक्त
दरम्यान, महापालिका उपायुक्त निखिल मोरे यांनी घटनास्थळाची पहाणी केली. ते म्हणाले, शुक्रवारी सायंकाळीच संबंधित हॉस्पिटलने एजन्सीकडून ऑक्सिजनचा पुरेसा साठा घेतला होता, तो शनिवारी दुपारपर्यंत पुरेल इतका शिल्लक होता. हॉस्पिटल प्रशासनाकडून ऑक्सिजन जोडणी करताना हलगर्जी झाल्यामुळे रुग्णाचा मृत्यू झाल्याचे सृकतदर्शनी दिसून येते. तरीही आम्ही डॉक्टर रिपोर्ट, पंचनामा करीत असून, चौकशीअंती दोषींवर कारवाई करू, असे आश्वासन दिले.
ऑक्सिजनबाबत बैठक सुरू असतानाच मृत्यू
पालकमंत्री सतेज पाटील यांनी शनिवारी सकाळी महाराष्ट्रदिनी ध्वजारोहण करून जिल्हाधिका-यांच्या दालनात जिल्ह्यातील ऑक्सिजन साठ्याबाबत अधिकाऱ्यांची बैठक घेतली. बैठकीला जिल्हाधिकारी दौलत देसाई, महानगरपालिका आयुक्त डॉ. कादंबरी कवाळे, पोलीस अधीक्षक शैलेश बलकवडे, प्रभारी मुख्य कार्यकारी अधिकारी अजयकुमार माने आदी अधिकारी उपस्थित होते, त्यावेळी जिल्ह्याला ऑक्सिजनची कमतरता भासणार नसल्याचा विश्वास मंत्री पाटील यांनी दिला. बैठक सुरू असतानाच हॉस्पिटलमध्ये माजी सैनिकाचा ऑक्सिजनअभावी मृत्यू झाल्याचे समोर आले.
कोट...
संबंधित रुग्ण हा दुस-या रुग्णालयातून येथे दाखल झाल्यापासून तो ऑक्सिजनला तितकासा सपोर्ट करत नव्हता. त्यांना ‘एनआरबीएम’ दिले. ऑक्सिजन ड्युरा संपल्यानंतर दुसरा सिलिंडर जोडेपर्यंतच अवघ्या पाच मिनिटात रुग्ण दगावला. जोडकामासाठी तितका वेळ लागतोच, त्यामध्ये कोणतीही हलगर्जी झालेली नाही. त्याच ऑक्सिजनवर असणारे इतर रुग्णही ठीक आहेत. - डॉ. शैलेद्र कुंभार, महालक्ष्मी हॉस्पिटल.