यड्राव : येथील दुष्काळ रस्ता निकृष्ट दर्जामुळे एक वर्षात दोनदा उखडला असल्याने या कामाच्या निकृष्ट दर्जाबाबत तक्रार झाली आहे. असे असतानाही प्रशासन ठेकेदाराला पाठीशी घालत असल्याने व ग्रामस्थांना या रस्त्यावरून ये-जा करणे धोकादायक बनल्याने तीव्र संताप व्यक्त होत आहे.
यड्राव येथील शेतवडीकडे जाणाऱ्या जांभळी हायस्कूल ते घाट मळा या दरम्यान असणाऱ्या दुष्काळ रस्ता मुरुमीकरण व खडीकरण करण्याची अनेक वर्षांपासूनची मागणी होती. त्यानुसार हा रस्ता तत्कालीन जि. प. बांधकाम सभापती सावकर मादनाईक यांच्या फंडातून करण्यात आला होता. त्यानंतर पुन्हा माजी आमदार उल्हास पाटील यांच्या फंडातून हा रस्ता डांबरीकरण करण्यासाठी मंजूर झाला होता. परंतु, हा रस्ता ठेकेदाराने खडीकरण व मुरुमीकरण करून पूर्ण केले आहे. या रस्त्यासाठी १० लाख रुपये निधी मंजुरीतून ६० मीटर खडीकरण आणि मुरुमीकरण करण्यात आले आहे. हे कामही ठेकेदाराकडून दर्जेदार झाले नसलेने ग्रामस्थांनी प्रशासनाकडे तक्रारी केल्याने व ‘लोकमत’मध्ये वृत्त प्रसिद्ध झाल्याने ऑक्टोबरमध्ये ठेकेदाराने या मार्गावर मुरूम टाकून रोलिंग केले होते. हा रस्ता डांबरीकरणासाठी मंजूर असतानाही या मार्गावर ठेकेदाराने मनमानी करून मुरुमीकरणाचे काम निकृष्ट पद्धतीने झाल्याने पुन्हा रस्ता पूर्णपणे उखडला आहे. यामुळे या रस्त्यावरून शेतवडीकडे जाणे अत्यंत गैरसोयीचे व धोकादायक बनले आहे. त्यामुळे रस्त्याचे काम चांगल्या पद्धतीने व्हावे, अशी मागणी शेतकऱ्यांतून होत आहे.
कोट - या दुष्काळी रस्त्यावर खडीकरण व मुरुमीकरण केले, तरीसुद्धा काही दिवसांत तो कायमच उखडला जातो. हा कायमचा त्रास सोडविण्यासाठी येथील शेतकऱ्यांनी आरोग्य राज्यमंत्री राजेंद्र पाटील-यड्रावकर यांची भेट घेतली असता, त्यांनी हा रस्ता डांबरीकरण करण्याचे आश्वासन दिले आहे.
- रमेश माने, शेतकरी यड्राव
फोटो - ३१०५२०२१-जेएवाय-०३
फोटो ओळ - यड्राव (ता. शिरोळ) येथील शेतवडीकडे जाणारा दुष्काळ रस्ता पुन्हा उखडल्याने शेतकरी बांधवांना ये-जा करणे अडचणीचे व धोकादायक बनले आहे.