दत्तवाड : दत्तवाड (ता. शिरोळ) येथील दूधगंगा नदीत एका महाकाय मगरीने घोड्यावर हल्ला केला. यामध्ये सुदैवाने घोड्याचा मालक या हल्ल्यातून बचावला. मगरीने घोड्याला ओढत नदीपात्रात नेले. यामध्ये शेतकऱ्याचे ४५ हजार रुपयांचे नुकसान झाले असून, तलाठी अश्विनी खराडे, पोलीस पाटील संजय पाटील यांनी घटनास्थळाची पाहणी करून पंचनामा केला.
येथील शेतकरी आण्णाप्पा शिरढोणे हे रविवारी दुपारी घोड्याला धुण्यासाठी दूधगंगा नदीपात्रात गेले होते. यावेळी अचानकपणे मगरीने त्यांच्यावर हल्ला केला. शिरढोणे यांनी तेथून पळ काढला. मात्र, मगरीच्या हल्ल्यात घोडा सापडला. मगर त्या घोड्याला ओढत नदीपात्रात घेऊन गेली.
नदीपात्रात मोठ्या प्रमाणात महिला धुणे धुण्यासाठी जात असतात. त्यामुळे ग्रामस्थांसह महिला वर्गात भीतीचे वातावरण पसरले आहे. दूधगंगा नदीवरील घोसरवाड बंधारा ते दत्तवाड येथील कोटलिंग भाग या परिसरात जवळपास दहा ते पंधरा मगरींचा वावर आहे. यापूर्वीदेखील एका गाईच्या खोंडावर मगरीने हल्ला केला होता. तसेच मेंढ्या व पाणी पिण्यासाठी नदीकाठावर गेलेल्या कुत्र्यावर देखील मगरीने हल्ला केला आहे.
नदीकाठाजवळ गवती कुरण असल्यामुळे मोठ्या प्रमाणात शेतकरी ये-जा करतात. तसेच मासेमारीसाठी देखील मोठ्या प्रमाणात ग्रामस्थ येत असतात. तसेच गवताच्या कुरणात अनेक शेतकरी गवत कापण्यासाठी दररोज जात असतात. शिवाय मासेमारीसाठी देखील अनेक नागरिक जातात. त्यामुळे या मगरींचा बंदोबस्त करावा, अशी मागणी ग्रामस्थांतून होत आहे.