कोल्हापूर : कोरोनाची लागण होणाऱ्यापेक्षा त्यातून चांगल्या उपचाराद्वारे बरे होणाऱ्यांची संख्या दिवसेंदिवस वाढतच चालली आहे. मंगळवारी जिल्ह्यातील मृत्यूचा आकडा पुन्हा एकदा १० च्या आत आला असून यात जिल्ह्यातील ७, तर बेळगाव जिल्ह्यातील १ अशा ८ जणांचा मृत्यू झाला आहे. दरम्यान, कोल्हापूर शहरात कोरोना बाधित होण्याचे प्रमाण कमी झाले असून मंगळवारी शहर दुसऱ्या क्रमांकावर आहे. शिरोळ तालुक्यात मात्र एकही मृत्यू नसलातरी मंगळवारी जिल्ह्यातील उच्चांकी ९८ रुग्ण येथे आढळले आहेत.
मंगळवारी सायंकाळी पाच वाजता आलेल्या अहवालानुसार जिल्ह्यात ४६१ जणांना कोरोनाची लागण झाली आहे. ६५४ जण कोरोनातून बरे झाले असून अजून ४ हजार ६८४ जण उपचार घेत आहेत. गेल्या चार महिन्यांनंतर पहिल्यांदाच कोरोना सक्रिय रुग्णांची संख्या पाच हजाराच्या आत आली आहे.
कोल्हापूर शहरासह हातकणंगले, कागल, गडहिंग्लज येथे मृत्यू दिसत आहेत. उर्वरित तालुक्यांमध्ये एकही मृत्यू नाही. गगनबावड्यात रुग्ण व मृत्यूही नाही. आजरा, चंदगड, भुदरगड, राधानगरी, पन्हाळा या तालुक्यामध्ये देखील कोरोना रुग्णांची संख्या एक अंकी झाली आहे. येथे मृत्यूही नाहीत.
आजचे मृत्यू
कोल्हापूर शहर : ०२ विक्रमनगर, कसबा बावडा
कागल : ०१ बामणी
गडहिंग्लज: ०१ गडहिंग्लज शहर
हातकणंगले : ०३ मजले, इचलकरंजी ०२
इतर जिल्हा : ०१ बेळगाव (कर्नाटक)