येथील शिवाजी उद्यमनगरमधील कोल्हापूर इंजिनिअरिंग असोसिएशनच्या सभागृहातील या कार्यक्रमास असोसिएशनचे अध्यक्ष सचिन मेनन, इंजिनिअरिंग एक्सपोर्ट प्रमोशन कौन्सिलचे स्वप्निल भोभाटे, बँक ऑफ महाराष्ट्रचे उपविभागीय व्यवस्थापक जी. एस. डी. प्रसाद, बँक ऑफ इंडियाचे मुख्य व्यवस्थापक संदीप पाटील, जिल्हा अग्रणी बँकेचे व्यवस्थापक गणेश शिंदे प्रमुख उपस्थित होते. अप्रत्यक्षपणे निर्यात करणाऱ्या उद्योजक, व्यावसायिकांनी शासनाच्या विविध योजनांचा लाभ घेऊन प्रत्यक्षपणे निर्यात करण्याचे पाऊल टाकावे. त्यांना जिल्हा प्रशासनाकडून आवश्यक ते सहकार्य केले जाईल. सध्या निर्यात करणाऱ्यांनी त्याचे स्वरूप वाढवावे. जिल्ह्याच्या पर्यटन विकासामध्ये योगदान द्यावे. ‘उद्योगमित्र’च्या बैठका यापुढे जिल्हाधिकारी कार्यालयाऐवजी औद्योगिक वसाहतींमध्ये आयोजित करून उद्योजकांचे प्रश्न जाणून घेतले जातील, असे जिल्हाधिकारी रेखावार यांनी सांगितले. प्रमुख उपस्थितांच्या हस्ते निर्यातदारांना प्रोत्साहन प्रमाणपत्र प्रदान करण्यात आले. यावेळी जिल्हा उद्योग केंद्राचे महाव्यवस्थापक सतीश शेळके, सहाय्यक सतीश जाधव, उद्योजक गोरख माळी, श्रीकांत दुधाणे, प्रसन्न तेरदाळकर, मंगेश पाटील, संजय पेंडसे, प्रदीप व्हरांबळे, आदींसह सुमारे दीडशे निर्यातदार उपस्थित होते. जिल्हा उद्योग केंद्राचे सहाय्यक प्रसाद काटाळे यांनी प्रास्ताविक केले. व्यवस्थापक मंजुषा चव्हाण यांनी आभार मानले.
प्रदर्शन, विविध विषयांवर मार्गदर्शन
या संमेलनात निर्यातदारांचे प्रदर्शन आयोजित केले होते. त्यात उद्योग, अभियांत्रिकी क्षेत्रातील उत्पादने, कोल्हापुरी गूळ, चप्पल, दागिने, कपडे, आदींचा समावेश होता. उद्घाटनानंतरच्या सत्रात निर्यातीबाबतच्या विविध विषयांवर तुषार कामत, स्वप्निल भोभाटे, जी. एस. डी. प्रसाद, संदीप पाटील यांनी मार्गदर्शन केले.