कोल्हापूर : मॉर्निंग वॉकला पायी जाणाऱ्या वृद्ध महिलेच्या गळ्यातील दोन तोळ्यांची सोन्याची चेन भरधाव वेगाने दुचाकीवरून आलेल्या चोरट्याने हिसका देऊन ‘धूम’ स्टाइलने पलायन केले. ही घटना कदमवाडी रोडवरील कारंडे मळा परिसरात घडली. याबाबत निर्मला श्रीचंद छाबडा (वय ६२, रा. मेरी गोल्ड अपार्टमेंट, कारंडे मळा, कोल्हापूर) यांनी चोरीची तक्रार शाहूपुरी पोलीस ठाण्यात दिली आहे.
पोलिसांनी दिलेली माहिती अशी की, निर्मला छाबडा या रोज मॉर्निंग वॉकसाठी बाहेर पडतात. बुधवारी सकाळी साडेसात वाजता त्या बाहेर पडल्या. कारंडे मळानजीक असणाऱ्या नाना कदम कार्यालय ते महादेव मंदिराकडे जाणाऱ्या रोडवर त्या आल्या होत्या. त्यावेळी पाठीमागून भरधाव वेगाने दुचाकीवरून आलेल्या चोरट्याने त्यांच्या मानेवर जोराचा फटका मारला, तसेच त्यांच्या गळ्यातील दोन तोळ्यांची सोन्याची चेन हिसका देऊन तितक्याच वेगाने तो पुढे निघून गेला. या घटनेनंतर परिसरात गोंधळ उडाला. छाबडा यांनी चेन चोरीची तक्रार शाहूपुरी पोलीस ठाण्यात दिली आहे.
चोरट्याचे वर्णन
‘चेन स्नॅचिंग’ केलेला चोरटा हा काळ्या रंगाच्या दुचाकीवरून आला होता. त्याच्या अंगात निळ्या रंगाचे जाकीट व निळ्या रंगाची जीन्स पॅन्ट होती. मजबूत बांधा, अंदाजे वय ३५ ते ४० वर्षे, असे त्याचे वर्णन फिर्यादी छाबडा यांनी पोलिसांना सांगितले.