कोल्हापूर : येथील कसबा बावड्यातील श्री प्रिन्स शिवाजीनगर मध्ये अज्ञात चोरट्याने घरफोडी करुन सुमारे ५९ हजाराचा सोन्या-चांदीचा ऐवज लंपास केला. याबाबत मारुती रामचंद्र सुतार यांनी बुधवारी रात्री उशिरा शाहुपूरी पोलीस ठाण्यात चोरीची तक्रार दिली.
पोलिसांनी दिलेली माहिती अशी की, श्री प्रिन्स शिवाजीनगरातील मारुती सुतार हे खासगी नोकरी करतात. दि. २७ मे रोजी ते सहकुटुंब आपल्या गावी गेले होते. बुधवारी सकाळी ते गावाहून घरी परतले. त्यावेळी घरी चोरी झाल्याचे लक्षात आले. अज्ञात चोरट्याने त्यांच्या बंद घराच्या मागील बाजूकडील खिडकीच्या काचा काढून आत प्रवेश केला. आत जाऊन चोरट्याने १२ ग्रॅमचे सोन्याचे कानातील टॉप्स व वेल, २ ग्रॅमचे सोन्याचे बदाम, १०० ग्रॅमचे चांदीचे ब्रेसलेट असा समारे ५९ हजार रुपये किंमतीचा ऐवज चोरुन नेला. याबाबत शाहुपूरी पोलीस ठाण्यात चोरीची तक्रार दाखल झाली असून सहायक फौजदार प्रकाश भंडारे हे तपास करत आहेत.