जयसिंगपूर : शहराला पाणीपुरवठा करणाऱ्या जॅकवेल येथील १०० एच.पी.चा स्टँडबाय मोटर पंप नादुरुस्त झाला आहे. त्यामुळे गुरुवार (दि. २४) ते शनिवार (दि. २६) अखेर पाणीपुरवठा अपुरा व कमी दाबाने होणार आहे. तरी नागरिकांनी उपलब्ध पाण्याचा वापर काटकसरीने करावा, असे आवाहन नगरपालिकेने केले आहे.
कुरुंदवाड येथे रहिमतखाँ यांना अभिवादन
कुरुंदवाड : येथील संस्थानकालीन जागतिक कीर्तीचे शास्त्रीय संगीत गायक आणि ग्वाल्हेर संगीत घराण्याचे वंशज भूगंधर्व रहिमतखाँ यांची ९९ वी पुण्यतिथी साजरी करण्यात आली. येथील दौलतशाहा वली दर्ग्याच्या मागील बाजूस भूगंधर्व रहिमतखाँ यांची कबर आहे. या कबरीस पुष्पहार अर्पण करून पुण्यतिथी साजरी करण्यात आली. यावेळी प्रा. दिलीप सुतार, शशिकांत पाटील, अन्सार पटेल, रावसाहेब पाटील, आप्पासाहेब पाटील उपस्थित होते.
--
सावता परिषदेचे तहसीलला निवेदन
शिरोळ : ओबीसीचे स्थानिक स्वराज्य संस्थेतील आरक्षण पूर्ववत करावे, अशा मागणीचे निवेदन सावता परिषदेच्यावतीने तहसीलदारांना देण्यात आले. सर्वाेच्च न्यायालयाने ओबीसी प्रवर्गाचे आरक्षण स्थगित केले आहे. त्यामुळे ओबीसी समाजाला मिळणारे राजकीय आरक्षण धोक्यात आले आहेत. आरक्षण पूर्ववत करावे, अन्यथा आंदोलन उभारण्याचा इशारा यावेळी देण्यात आला. निवेदनावर श्रीकांत माळी, सुरेश माळी यांच्या स्वाक्षऱ्या आहेत.