बोलेरो-दुचाकीची धडक; दोन तरुण ठार

चिक्कोडीजवळ अपघात : मृत गडहिंग्लज, हसूरवाडीचे

निपाणी/संकेश्वर : बोलेरोे व हिरो होंडा पॅशन प्रो या दुचाकीत धडक होऊन झालेल्या अपघातात दुचाकीवरील चालक संदीप तानाजी जाधव (वय २६, मूळगाव हसूरवाडी, ता. गडहिंग्लज, सध्या रा. शिवाजी चौक, गडहिंग्लज), संदीप शिवाजी पाटील (२५, रा. शिवाजी चौक, गडहिंग्लज) यांचा दुर्दैवी मृत्यू झाला. संकेश्वरपासून १० कि. मी. अंतरावरील बोरगल फाट्यानजीक सकाळी दहाच्या सुमारास हा अपघात घडला. याबाबत पोलिसांतून मिळालेली माहिती अशी, तोरणहळ्ळी (ता. चिक्कोडी) येथील मारुती देवाच्या दर्शनासाठी नवीन दुचाकीवरून (पॅशन प्रो-नंबर नाही) संदीप जाधव व संदीप पाटील हे गडहिंग्लजहून संकेश्वरमार्गे चिक्कोडीकडे जात होते. दरम्यान, बोरगल फाट्यानजीक आल्यावर समोर असणाऱ्या क्रुझर वाहनाचा वेग कमी झाल्याने दुचाकी बाजूला घेऊन ओव्हरटेक करताना समोरून येणाऱ्या बेलोरो गाडी (केए २३, एम ८१८५)ला दुचाकीची जोराची धडक दिली. या धडकेत दुचाकीचालक संदीप जाधव याच्या डोक्याला व छातीला गंभीर दुखापत झाल्याने त्याचा जागीच मृत्यू झाला. पाठीमागे बसलेला संदीप पाटील हा उडून बेलोरो गाडीवर जाऊन आदळल्याने तो गंभीर जखमी झाल्याने त्याला उपचारासाठी संकेश्वरला आणतेवेळी वाटेतच त्याचाही मृत्यू झाला. अपघातात दुचाकीचा चक्काचूर झाला आहे. संदीप जाधव याने सध्या नवीन दुचाकी गाडी घेतली होती. दरम्यान, गडहिंग्लज भागातील काही युवक तोरणहळ्ळीला देवदर्शनाला जात असताना त्यांच्या निदर्शनास ही घटना आली. त्यामधील काही युवकांना अपघातातील जखमी व मृत संजय यांची ओळख पटल्याने त्यांनी तत्काळ नातेवाइकांना व मित्रांना अपघाताची माहिती दिली. लक्ष्मण शिवाप्पा बिसनाईक (रा. हल्याळ, ता. अथणी) यांच्या फिर्यादीवरून अपघाताची संकेश्वर पोलिसांत नोंद झाली आहे. घटनास्थळी गोकाक विभागीय अतिरिक्त पोलीस उपअधीक्षक न्यामगौडर, मंडल पोलीस उपनिरीक्षक एस. सी. पाटील यांनी भेट दिली. अधिक तपास संकेश्वरचे पोलीस उपनिरीक्षक कुमार हितलमणी करीत आहेत. संदीप पाटील व संदीप जाधव हे दोघेही जिवलग मित्र होते. ते गडहिंग्लज शहरातील बॉम्बे क्लॉथ सेंटर या कापड दुकानात कामास होते. संदीप पाटील याच्या पश्चात आई, वडील, भाऊ, बहीण, तर संदीप जाधव याच्या पश्चात आई, वडील, भाऊ, बहीण असा परिवार आहे. संदीप जाधव हा शिवसेनेच्या गडहिंग्लज शहर महिला संघटक मंगल जाधव यांचा मुलगा आहे. (प्रतिनिधी)