बेकरी कामगाराचा निर्घृण खून

इचलकरंजीतील घटना : तीक्ष्ण हत्याराने ४० ते ४२ वार; दोघे संशयित ताब्यात बेकरी कामगाराचा निर्घृण खून इचलकरंजी : येथील नदीवेस परिसरातील नरसोबा कट्टा येथे राहणाऱ्या महादेव इराप्पा टकळगी (वय २१) या तरुणाचा तीक्ष्ण हत्याराने ४० ते ४२ वार करून निर्घृण खून करण्यात आला. ही घटना काल, सोमवारी मध्यरात्रीच्या सुमारास नदीवेस नाक्याजवळ असलेल्या वीटभट्टीजवळ घडली. याबाबत शिवाजीनगर पोलीस ठाण्यात नोंद झाली आहे. आर्थिक देवघेव किंवा अनैतिक संबंधातून हा खून झाला असावा, असा प्राथमिक अंदाज पोलिसांनी व्यक्त केला आहे. या खुनाचे धागेदोरे पोलिसांच्या हाती लागले असून, या प्रकरणी दोघांना चौकशीसाठी ताब्यात घेतले आहे, तर एक पथक तपासासाठी कर्नाटकच्या दिशेने रवाना झाले आहे. याबाबत पोलिसांतून मिळालेली माहिती अशी, मृत महादेव हा येथील बिग बझारजवळील बालाजी बेकरीमध्ये भट्टीवर काम करीत होता. काल रात्री त्याचा अज्ञात मारेकऱ्यांनी धारदार शस्त्रांनी ४० ते ४२ वार करून निर्घृण खून केला. यामध्ये महादेवच्या डोक्यात, गळ्यावर, छातीवर, पोटावर वार करण्यात आले होते. आज, मंगळवारी सकाळी फिरायला जाणारे नागरिक व अंगारकी संकष्टीनिमित्त नदीवरील गणपती मंदिराकडे जाणाऱ्या नागरिकांना महादेवचा मृतदेह आढळून आला. पोलिसांना याबाबत माहिती मिळताच पोलीस घटनास्थळी गेले. तेथे महादेव मृतावस्थेत पडलेला आढळला. पोलिसांनी घटनास्थळाचा पंचनामा करून मृतदेह नगरपालिकेच्या आयजीएम रुग्णालयात शवविच्छेदनासाठी नेला. तेथून नातेवाइकांच्या ताब्यात दिला. घटनास्थळावरून पोलिसांनी जांबिया, दारूची बाटली व दगड जप्त केला आहे. दरम्यान, खुनाच्या घटनेनंतर पोलिसांनी मारेकऱ्यांची शोधाशोध सुरू केली. प्राथमिक तपासासाठी दोघा संशयितांना ताब्यात घेतले असून, यातील एकजण अल्पवयीन असल्याचेही समजते. नेमका खून कोणत्या कारणासाठी केला व (पान ४ वर)