लोकमत न्यूज नेटवर्क
सरूड : सरुड ( ता . शाहूवाडी ) येथील शरद भगवान पाटील ( वय २७ ) या मुंबई पोलीस दलात कार्यरत असणाऱ्या तरुणाचा मुंबईत आकस्मिक मृत्यू झाला. मनमिळावू स्वभाव असणाऱ्या शरदची ही अकाली एक्झिट सरूड परिसरातील नागरिकांसह तरुणांच्या मनाला चटका लावणारी ठरली आहे . त्याच्या अकाली मृत्युने परिसरात हळहळ व्यक्त होत आहे .
याबाबत अधिक माहिती अशी शरद पाटील हा २०१६ मध्ये मुंबई पोलीस दलात कॉन्स्टेबल पदावर भरती झाला होता. तेव्हापासून तो नायगाव येथील पोलीस मुख्यालयात कार्यरत होता. सोमवारी दुपारी ४ वा.च्या सुमारास आपल्या राहत्या खोलीवर असतानाच त्याला अचानक अस्वस्थ वाटू लागल्याने त्याच्या सहकाऱ्यांनी त्याला उपचारासाठी दवाखान्यात दाखल केले, परंतु उपचारापूर्वीच त्याचा मृत्यू झाला. बुधवारी सकाळी शरदचे पार्थिव सरूड येथे आणण्यात आले . यावेळी पोलीस दलाच्या वतीने शाहूवाडीचे पोलीस निरीक्षक विजय पाटील यांनी शरदच्या पार्थिवावर पुष्पचक्र अर्पण करून आदरांजली वाहली. त्यानंतर पोलीस दलाच्या वतीने मानवंदना देऊन शासकीय इतमामात शरदच्या पार्थिवावर अंत्यसंस्कार करण्यात आले. शरद हा जेष्ठ पत्रकार प्रा. डॉ. डी. आर. पाटील व संग्राम पाटील यांचा लहान भाऊ होता. रक्षाविसर्जन गुरुवार दि २९ रोजी आहे.