कोल्हापूर : कोल्हापूर विभागीय क्रीडा उपसंचालक डाॅ. माणिकराव ठोसरे हे जानेवारी २०२१ मध्ये नियत वयोमानानुसार निवृत्त झाल्यामुळे रिक्त जागेवर भंडारा, बुलढाण्याचे प्रभारी आणि अमरावतीचे क्रीडा उपसंचालक संजय सबनीस यांची क्रीडा व युवा सेवा संचालनालयाने नियुक्ती केली. ते पुढील आठवड्यात पदभार स्वीकारणार आहेत.
मूळचे अकोल्याचे असलेले सबनीस २००१ साली तालुका क्रीडा अधिकारी म्हणून क्रीडा व युवा सेवा संचलनालयात रुजू झाले होते. त्यानंतर २००५ साली ते बुलढाणा येथे जिल्हा क्रीडाअधिकारी झाले. त्यानंतर पुणे बालेवाडी येथे झालेल्या काॅमनवेल्थ गेमसाठी त्यांची नियुक्ती समन्वयक म्हणून करण्यात आली. एक उत्तम क्रीडा संघटक म्हणून त्यांनी स्पर्धेचे उत्तम नियोजन केले. या स्पर्धेनंतर त्यांची बालेवाडी क्रीडा संकुलात नेमणूक झाली. या दरम्यान त्यांनी ८ खेळांमधील भारतीय संघाचे ७० सराव शिबिरे यशस्वी पूर्ण करुन दाखविली.
चौकट
निवृत्त झालेले डाॅ. माणिकराव ठोसरे एक उत्तम वेटलिफ्टर म्हणून प्रसिद्ध होते. उपसंचालकपदाच्या दीड वर्षाच्या कालावधीत त्यांनी कोल्हापूरच्या विभागीय क्रीडा संकुलातील शूटिंग रेंज अद्ययावत करण्यासाठी ३ कोटी १५ लाख रुपयांचा निधी मंजूर करून आणला. या संकुलाच्या विकासासाठी आणखी ५ कोटी रुपयांच्या नव्या विकास निधीचा आराखडा क्रीडा मंत्रालयाला सादर केला. यात बॅडमिंटन हाॅल, निवासी संकुल आदीचा समावेश आहे. हा निधीही लवकरच क्रीडा संकुलाला मिळणार आहे.
फोटो : ३१०५२०२१-कोल-संजय सबनीस