आयकर विभागाची वेबसाइट हँग होत असल्याने मनस्ताप

विश्वास पाटील-लोकमत न्यूज नेटवर्क

कोल्हापूर : आयकर विभागाची नवी वेबसाइट वारंवार हँग होत आहेच, परंतु अनेक सुविधा अद्याप सुरूच झाल्या नाहीत. त्याचा करदाते व करसल्लागारांना प्रचंड मनस्ताप होत आहे. त्याबद्दल देशभरातून तक्रारी आल्यानंतर आता वित्त मंत्रालय व वेबसाइट तयार करणाऱ्या इन्फोसिस कंपनीच्या अधिकाऱ्यांची बैठक २२ जूनला होत आहे. त्यामध्ये येणाऱ्या अडचणींबाबत चर्चा केली जाणार आहे.

देशात जेव्हा २०१७ मध्ये वस्तू व सेवा कर (जीएसटी) लागू केला तेव्हा त्यांनी नवीन वेबसाइट सुरू केली. ही वेबसाइट इन्फोसिसनेच तयार केली होती. ती आजही परिपूर्ण आणि पूर्ण क्षमतेने सुरू नाही. त्यामुळे करदाते आयकर विभागाची जुनी वेबसाइट किती चांगली आहे, असा दाखला आजही देत असत. आता नेमका त्याच्या उलटा अनुभव येत आहे. वित्त मंत्रालयाने यंदा नवीन वेबसाइट लाँँच करणार असल्याचे सांगितले. हे काम जुना अनुभव वाईट असताना पुन्हा इन्फोसिसलाच देण्यात आले. त्यासाठी ४२०० कोटी रुपये खर्च करण्यात आले. नवीन वेबसाइट येणार असल्याने १ ते ६ जून जुनी वेबसाइट बंद ठेवण्यात आली. ७ जून पासून ती एकदम जलद सुरू होईल, असे सांगण्यात आले होते. परंतु त्यादिवशी दिवसभर ती बंदच राहिली. रात्री १० नंतर ती कधीतरी ती सुरू झाली. त्यानंतर आता जून मध्यावर आला तरी अजूनही लवकर लॉगीन होत नाही, वारंवार हँग होणे, वेबसाइटवरील व्यवहार संथगतीने होणे अशा तक्रारी देशभरातून आल्या आहेत. त्याची नोंद घेऊन वित्तमंत्री निर्मला सीतारामन यांनी ट्विट केले असून लोकांच्या तक्रारी लक्षात घेऊन वेबसाइटमध्ये तातडीने दुरुस्ती करण्याची सूचना त्यांनी केली आहे.

-------

कोणतेही नवी प्रणाली आणताना काही अडचणी येतात, परंतु त्याची अंमलबजावणी करण्याआधी योग्य चाचणी आणि तपासणी होणे गरजेचे असते. जीएसटीचा अनुभव वाईट असताना पुन्हा पूर्वतयारी न करता बदल केल्यामुळे करदात्यांना प्रचंड अडचणी येत आहेत. नवीन प्रणाली सुरू होईपर्यंत जुनी वेबसाइट सुरू ठेवावी.

- दीपेश गुंदेशा

चार्टर्ड अकौटंट, कोल्हापूर

(फोटो १६०६२०२१-कोल-दीपेश गुंदेशा-सीए)

वेबसाइटला गती नसल्याने कोणती कामे रखडली

१. आर्थिक वर्षाचे परतावा फाइल करण्याचे काम ३१ मार्चनंतर सुरू होते. यावर्षी जून संपत आला तरी ते करता आलेले नाही. त्यामुळे रिटर्न्स फाइल करण्याची मुदत ३१ जुलैऐवजी ३० सप्टेंबरपर्यंत वाढवली आहे.

२. जुन्या वेबसाइटवरील मागील दहा वर्षांचे रिटर्न्स सहज डाऊनलोड होत होते. आता ते होत नाही.

३. आयकरसंबंधी तक्रारींच्या नोटीस व त्याचे खुलासेही देण्याचे काम ठप्प

४. टीडीएस रिटर्न्स भरण्याचे काम थांबले

५. विदेशातील पेमेंटसाठी बँकांना ऑनलाइन परवानगी लागते ती मिळण्यात अडचण

नवीन वेबसाइट : www.incometaxindia.gov.in

जुनी वेबसाइट : www.incometax.efiling.gov.in