कोगनोळी : महाराष्ट्र व केरळमध्ये दुसऱ्या टप्प्यात कोरोना रुग्णांची वाढती संख्या लक्षात घेऊन कर्नाटक प्रशासनाने आंतरराज्य सीमेवर तपासणी पथक उभे केले आहे. कोगनोळीजवळील या सीमेवरून कर्नाटक राज्यात प्रवेश करणाऱ्या प्रवाशांना थर्मल स्क्रीनिंग करूनच राज्यात प्रवेश दिला जात आहे. शेजारील राज्यांप्रमाणे आपल्या राज्यातही दुसऱ्या टप्प्याचा प्रादुर्भाव होऊ नये यासाठी सावध पवित्रा घेत बाहेरून येणाऱ्या प्रवाशांवर प्रशासन करडी नजर ठेवत असल्याचे निदर्शनास येत आहे.
शनिवार दिनांक 20 रोजी कोगनोळी टोल नाका याठिकाणी कोरोना तपासणी पथकाची उभारणी केल्यानंतर कर्नाटक राज्यात प्रवेश करणाऱ्या व्यक्तींना कोरोना निगेटिव्ह प्रमाणपत्र अनिवार्य केले असल्याचे तहसीलदार प्रकाश गायकवाड यांनी सांगितले होते. या पार्श्वभूमीवर आज प्रांताधिकारी युकेश कुमार यांनी या तपासणी नाक्याला भेट देऊन पाहणी केली व कोरोना निगेटिव्ह प्रमाणपत्र अनिवार्य केले असल्याच्या वक्तव्यास दुजोरा दिला.
यावेळी बोलताना प्रांताधिकारी युकेश कुमार म्हणाले, प्रमाणपत्र सक्तीचे केले असले तरी त्याबाबत जनतेमध्ये जागृती होणे आवश्यक आहे. या सीमेवर वाहतूक जास्त आहे त्याबरोबरच स्थानिक लोकांचाही वारंवार प्रवास होत असतो. या सर्व गोष्टी नियंत्रणात ठेवण्यासाठी हळूहळू पावले उचलली जात आहेत.
यावेळी निपाणी तालुका पंचायत कार्यवाहक मल्लिकार्जुन उळागड्डी, निपाणी नगरपालिकेचे आयुक्त महावीर बोरन्नावर, तालुका आरोग्य अधिकारी विठ्ठल शिंदे यांच्यासह इतर अधिकारी उपस्थित होते.
फोटो ओळ : कोगनोळी टोलनाक्यावरून कर्नाटकात प्रवेश करणाऱ्या वाहनधारकांना कोविड निगेटिव्ह प्रमाणपत्र अनिवार्य असल्याबाबत प्रांताधिकारी युकेश कुमार यांनी आवाहन केले.
छाया : बाबासो हळिज्वाळे