कोल्हापूर : केएमटी बस खड्डयातून घालून सीटवर बसलेल्या महिला प्रवाशाच्या पाठीच्या मणक्याला दुखापत झाली. याप्रकरणी प्रवासी सुलोचना वसंत चव्हाण (वय ६०, रा. सागर माळ परिसर) यांनी केएमटी चालक अमोल कांबळे याच्यावर राजारामपुरी पोलीस ठाण्यात तक्रार दिली. सायबर चौक ते शाहू मैदान या मार्गावरून प्रवास करताना शनिवारी हा प्रकार घडला होता.
भांडण सोडवणाऱ्यास मारहाण
कोल्हापूर : कुल्फी गाडाचालकास मारहाण सुरू असताना भांडणे सोडविण्यास गेलेल्या तरुणास काठीने बेदम मारहाण करण्याचा प्रकार घडला. तौफिक नुरमहंमद सय्यद (वय २९, रा. सदरबाझार) असे जखमीचे नाव आहे. त्याच्या डोळ्यानजीक गंभीर दुखापत झाली आहे. मध्यवती बस स्थानक परिसरात रविवारी हा प्रकार घडला. शाहुपूरी पोलीस चौघा हल्लेखोरांचा पोलीस शोध घेत आहेत.
रॉडच्या हल्ल्यात एक जखमी
कोल्हापूर : मावशीला शिवीगाळ का करतोस असा जाब विचारल्याच्या कारणावरून मायाप्पा वसंत कांबळे (३५, रा. विचारेमाळ) यांना लोखंडी रॉडने मारहाण करण्यात आली. त्यांच्या डोक्यात गंभीर दुखापत झाली आहे. त्यांना सीपीआर रुग्णालयात दाखल केले आहे. याप्रकरणी शाहूपुरी पोलीस ठाण्यात सचिन सोमा कांबळे (रा. विचारेमाळ) याच्यावर गुन्हा दाखल झाला आहे.
भाजीमंडईतून मोबाइल लंपास
कोल्हापूर : गंगावेश येथील ऋणमुक्तेश्वर भाजीमंडईतून भाजीखरेदी करणारे अशोक नळुकराव रणदिवे (६६, रा. शनिवारपेठ) यांचा ४० हजार रुपये किमतीचा मोबाइल अज्ञात चोरट्याने लंपास केला. आठवडी बाजारावेळी हा प्रकार घडला. लक्ष्मीपुरी पोलीस ठाण्यात याप्रकरणी गुन्हा दाखल झाला आहे.