कोल्हापूर : कोविड-१९ संसर्गाच्या ब्रेक द चेनची अंमलबजावणी म्हणून जिल्ह्यात पोलिसांनी नाकाबंदी सुरू केली आहे. दिवसभरात माॅर्निंग वाॅक करणारे, विनाकारण वाहन फिरविणारे व मोटार वाहन कायद्यानुसार आणि मास्क न घालणारे अशा विविध कारणावरून पोलिसांनी बुधवारी दिवसभरात पावणेसहा लाखाचा दंड वसूल केला. यासोबतच १३२ वाहने जप्त केली.
कोरोना संसर्गाची साखळी तोडण्यासाठी जिल्हा प्रशासनासह पोलिसांनी कंबर कसली आहे. दिवस-रात्र बंदोबस्त आणि रस्त्यावर विनाकारण फिरणाऱ्यांना अटकाव करणे आदी कामे पोलीस करीत आहेत. याच कारवाईचा एक भाग म्हणून जिल्ह्यात दिवसभरात १३०८ जणांकडून विनाकारण वाहन फिरविल्याबद्दल २ लाख ७२ हजाराचा दंड वसूल केला. तर सकाळी माॅर्निंग वाॅकर म्हणून फिरणाऱ्या ३८० जणांवर गुन्हे दाखल करीत त्यांच्याकडून १ लाख ५६ हजार ८०० रुपयाचाही दंड वसूल केला. यासोबतच मास्क न घातलेल्या ४३९ नागरिकांवर कारवाई करीत १ लाख १७ हजार ६०० रुपये व २४ आस्थापनांवर कारवाई करीत ३० हजार ६६० आणि १३२ वाहने जप्त केली. या सर्वातून ५ लाख ७७ हजार ५०० इतका महसूल दिवसभरात सरकारी तिजोरीत जमा झाला. यापुढेही ही कारवाई आणखी तीव्र केली जाणार आहे.