‘थेट पाईपलाईन’ साठी२१ कोटी २७ लाखांचा निधी

 कोल्हापूर : कोल्हापूरकरांचे स्वप्न असलेल्या काळम्मावाडी थेट पाईपलाईनसाठी राज्य शासनाने आपल्या हिश्श्याच्या निधीपैकी पहिला टप्पा म्हणून २१ कोटी २७ लाख ५ हजार रुपयांचा निधी कोल्हापूर महानगरपालिकेस वितरित केला आहे. याबाबतचा शासन निर्णय दि. १५ मे रोजी झाला आहे. केंद्र सरकारच्या जवाहरलाल नेहरू राष्टÑीय नागरी पुनर्निर्माण अभियानांतर्गत (युआयडीएसएसएमटी) काळम्मावाडी पाईपलाईन योजना राबविण्यात येत आहे. योजना ४२५ कोटी ४१ लाख रुपयांची आहे. त्यापैकी ८० टक्के निधी केंद्र शासन आणि राज्य शासन व कोल्हापूर महानगरपालिका प्रत्येकी १० टक्के निधी देणार आहे. त्यानुसार केंद्र शासनाने पहिल्या टप्प्यातील निधी गेल्या चार महिन्यांपूर्वी दिला आहे. त्या अनुषंगाने केंद्राच्या वितरित निधीच्या प्रमाणात राज्य शासनाचा हिस्सा म्हणून २१ कोटी २७ लाख ५ हजार रुपये इतका निधी आयुक्त तथा संचालक, नगरपरिषद प्रशासन संचालनालय यांनी राखीव करून ठेवलेला होता. त्यानुसार संबंधित निधीच्या रकमेचा धनादेश आयुक्त, कोल्हापूर महानगरपालिका यांच्याकडे सुपूर्द करावा. तसेच याबाबत केलेल्या कार्यवाहीचा अहवाल शासनास सादर करावा, असा आदेश सहायक संचालक, नगरपरिषद प्रशासन संचालनालय यांना शासनाने दिला आहे. राज्य सरकारकडे निवडणुकीपूर्वीच हा निधी आला होता. मात्र, आचारसंहितेमुळे तो वितरीत झाला नव्हता. संबंधित निधी महापालिकेला वितरित करण्याबाबत दि. १५ मे रोजी आदेश दिला आहे. त्यामुळे आता थेट पाईपलाईनचे काम वेग घेणार आहे. (प्रतिनिधी)