गव्यापासून वाचण्यासाठी तीन तास काढले झाडावर

बोंद्री जंगलातील घटना : भयभीत ग्रामस्थाची पाचावर धारण

मणदूरे : जाईचीवाडी, ता. पाटण येथील येथील संपत पवार गव्यांपासून वाचण्यासाठी झाडावर चढले. तीन तास झाडावर राहूनही गव्यांनी त्यांचा पिच्छा सोडला नाही. ही घटना गावात समजल्यानंतर ग्रामस्थांनी धाव घेऊन गव्यांना हुसकावून लावले आणि पवार खाली उतरले. बोंद्री येथे घनदाट जंगल आहे. जंगलातच गव्याच्या कळपाचे वास्तव्य आहे. जाईचीवाडीकरांना जंगलातून बोंद्री गावाकडे जावे लागते. संपत पवार यांचे मंगळवारी ग्रामसेवकाकडे काम होते. सकाळी ते बोंद्रीला जाण्यासाठी घरातून बाहेर पडले. जंगलातील पायवाटेने जात असताना अचानक त्यांच्यासमोर गव्याचा कळप आला. त्यामुळे घाबरून संपत पवार यांनी पाठीमागे धाव घेतली. गव्याच्या कळपानेही त्यांचा पाठलाग सुरू केला. ते झाडावर चढले. कळप खाली येऊन थांबला. काही गवे निघून गेले. मात्र, एक गवा थांबला. आरडाओरडा करूनही तो निघून गेला नाही. दरम्यान, साडेअकरा वाजण्याच्या सुमारास बोंद्री येथील निनू मोहिते व तानाजी मोहिते हे जंगल परिसरात काही कामानिमित्त आले होते. त्यांना संपत यांचा ओरडण्याचा आवाज आला. दोघांनी त्याठिकाणी जाऊन गव्याला दगड मारले. मात्र, तो तेथुन हलला नाही. त्यामुळे निनू व तानाजी यांनी गावातून आणखी काही ग्रामस्थांना येथे बोलावले. ग्रामस्थांनी आरडाओरडा केल्यानंतर गवा तेथून जंगलात निघुन गेला. अखेर तीन तासानंतर संपत पवार हे झाडावरून खाली उतरले. (वार्ताहर) जखमीला तुटपूंजी मदत जाईचीवाडी येथील धोंडीराम पवार या शेतकर्‍यावर गतवर्षी गव्याने हल्ला केला होता. त्यामध्ये ते गंभीर जखमी झाले होते. कºहाड येथील उपजिल्हा रूग्णालय व त्यानंतर कृष्णा रूग्णालयात धोंडीराम यांच्यावर उपचार करण्यात आले. या उपचाराचा खर्च हजारोच्या घरात गेला असताना वनविभागाकडून पवार कुटुंबियांना तुटपूंजी मदत देण्यात आली होती.