ऑनलाइन टीम
सॅनफ्रान्सिस्को, दि. १ - सोशल नेटवर्किंग जगतातील ख्यातनाम साईट ऑर्कुट लवकरच नेटीझन्सना अलविदा करणार आहे. फेसबुक, ट्विटर आणि अन्य सोशल नेटवर्किंग साईट्समुळे मागे पडलेले ऑर्कुट बंद करण्याचा निर्णय गुगलने घेतला आहे.
१० वर्षांपूर्वी गुगलने ऑर्कुट ही सोशल नेटवर्किंग साईट आणून इंटरनेट विश्वात नवी क्रांतीच घडवली. अवघ्या काही वर्षांतच ऑर्कुट जगभरात लोकप्रिय झाले. मात्र गेल्या काही वर्षांपासून फेसबुक, ट्विटर यासारख्या साईट्सने ऑर्कुटला मागे टाकले. २०११ मध्ये गुगलने गुगल प्लस ही नवी सोशल नेटवर्किंग सुविधा सुरु केली त्यावेळीच ऑर्कुट बंद होणार असे संकेत देण्यात आले होते.सोमवारी गुगलचे डायरेक्टर पॉलो गोल्घेर यांनी ब्लॉगद्वारे ऑर्कुट बंद करण्याची घोषणा केली. ३० सप्टेंबर २०१४ पासून ही सुविधा बंद करण्यात येईल असे त्यांनी सांगितले. भविष्यात गुगल प्लस, युट्यूब यावर भर देणार असल्याचे त्यांनी म्हटले आहे.