सिगारेट मागितल्याने डोक्यात घातली बियरची बाटली

सिगारेट मागितल्याने आरोपीने युवकाच्या डोक्यात टेबलवरील बियरची बाटली डोक्यात घातली.

अकोला: प्यायला सिगारेट मागितल्याने आरोपीने युवकाच्या डोक्यात टेबलवरील बियरची बाटली उचलून त्याच्या डोक्यावर हाणली. ही घटना मंगळवारी दुपारी २ वाजताच्या सुमारास सिंधी कॅम्प परिसरातील एका बारवर घडली. याप्रकरणी खदान पोलिसांनी आरोपीविरुद्ध गुन्हा दाखल केला. ख्रिश्‍चन कॉलनीमध्ये राहणारा आशीष सुरेश बोराडे (२९) हा त्याच्याच घराजवळ राहणारा अजय वानखडे याच्यासोबत सिंधी कॅम्पमधील एका वाईन बारमध्ये दारू पिण्यासाठी गेला. दोघांनी वाईन बारमध्ये यथेच्छ दारू ढोसली. दरम्यान, अजय वानखडे याने खिशातील सिगारेटचे पाकीट काढले आणि त्यातील सिगारेट घेऊन ती पेटविण्यास घेतली असता आशीषने त्याला एक सिगारेट मागितली. त्यावरून आरोपी अजय वानखडे हा चिडला आणि त्याने भिकारड्या म्हणत टेबलवर असलेली बियरची बाटली उचलून आशीषच्या डोक्यात घातली. यात आशीष बोराडे हा गंभीर जखमी झाला. त्याला उपचारासाठी सर्वोपचार रुग्णालयात दाखल करण्यात आले. आशीष बोराडे याच्यातर्फे पोलिस उपनिरीक्षक इंगळे यांनी दिलेल्या तक्रारीनुसार खदान पोलिसांनी आरोपीविरुद्ध भादंवि कलम ३२६ नुसार गुन्हा दाखल केला.