सचिन देव
जळगाव : रेल्वे गाड्यांप्रमाणे प्रवाशांना एसटी बसचेही घर बसल्या लाइव्ह लोकेशन समजण्यासाठी एसटी महामंडळाने व्हीटीएस (व्हेईकल ट्रॅकिंग सिस्टीम) प्रणाली अंमलात आणली आहे. यामुळे प्रवाशांना आगारात निघालेली बस सध्या कुठे आहे, संबंधित गावाला ही बस किती वाजता पोहचेल, आधी माहिती प्रवाशांना व्हीटीएस प्रणालीमुळे तत्काळ समजणार आहे. गेल्या दोन वर्षांपासून महामंडळातर्फे राज्यातील प्रत्येक आगारात या प्रणालीचे काम सुरू आहे. यंदा १५ ऑगस्टला राज्यभरात व्हीटीएस नावाच्या मोबाइल ॲपद्वारे ही सिस्टीम कार्यान्वित करण्यात येणार होती. मात्र, अद्यापही याप्रणालीचे तांत्रिक काम अपूर्ण असल्यामुळे १५ ऑगस्टचा मुहूर्तही हुकला आहे.
इन्फो :
बस कुठे आहे हे आधीच कळणार
`व्हीटीएस` सिस्टीमद्वारे आगारातून निघालेली बस ताशी किती वेगाने धावते आहे, सध्या ती कुठल्या थांब्यावर आहे, पुढच्या थांब्यावर ती केव्हा पोहचेल ही माहिती प्रवाशांना `व्हीटीएस`ॲपद्वारे कळणार आहे. याप्रणालीसाठी जळगाव आगारात ठिकठिकाणी स्क्रिन लावण्यात आले असून, जिल्ह्यातील ७३७ बसेसला `व्हीटीएस` सिस्टीम लावण्यात आली आहे.
इन्फो :
किती बसेसला बसविली यंत्रणा
जळगाव : ११७
यावल : ६१
चाळीसगाव : ७६
मुक्ताईनगर : ४७
भुसावळ : ४५
रावेर : ५६
चोपडा : ७७
एरंडोल : ५४
अमळनेर : ७१
पाचोरा : ५५
जामनेर : ७८
एकूण : ७३७
इन्फो :
१५ ऑगस्टचा मुहूर्त हुकला
-एसटी महामंडळातर्फे गेल्या दोन वर्षांपासून राज्यभरातील आगारांमध्ये व्हेईकल ट्रॅकिंग सिस्टीमचे कामकाज सुरू आहे. यंदा स्वातंत्र्य दिनापासून राज्यात एकाचवेळी ही सिस्टीम सुरू करण्यात येणार होती. मात्र, इतर तांत्रिक कामे अपूर्ण असल्यामुळे १५ ऑगस्टचा मुहूर्त हुकला आहे.
- सध्या राज्यभरात व्हीटीएस प्रणालीचे ९० टक्के काम पूर्ण झाले आहे. येत्या महिनाभरात उर्वरित तांत्रिक कामेही पूर्ण होऊन, ही सिस्टीम सुरू होणार असल्याचा अंदाज आगार प्रशासनातर्फे वर्तविण्यात येत आहे.
- महामंडळातर्फे राज्यभरात एकाचवेळी ही सिस्टीम सुरू करण्याचे नियोजन आहे. काही आगारांमध्ये सिस्टीमचे काम अपूर्ण असल्यामुळे, ही प्रणाली सुरू होण्यास विलंब होत असल्याचे महामंडळ प्रशासनातर्फे सांगण्यात आले.
इन्फो :
`व्हीटीएस`प्रणालीचे काम जळगाव विभागात १०० टक्के काम पूर्ण झाले आहे. मात्र, या प्रणालीचे महामंडळाकडून ॲप विकसित न करण्यात आल्यामुळे याप्रणालीच्या उद्घाटनाचा मुहूर्त लांबणीवर पडला आहे. जसे महामंडळाकडून ॲप विकसित होईल, तशी ही प्रणाली सुरू करण्यात येईल.
भगवान जगनोर, विभाग नियंत्रक, जळगाव विभाग