जळगाव : मुलीसाठी कपडे खरेदी करायला आलेल्या मनीषा भिका पाटील (वय ३८, रा.धानवड, ता. जळगाव) या महिलेच्या गळ्यातील २० हजार रुपये किमतीचे मंगळसूत्र,मनी व वाट्या चोरट्यांनी लांबविल्याची घटना गुरुवारी सकाळी ११ वाजता फुले मार्केटमध्ये घडली.
सूत्रांनी दिलेल्या माहितीनुसार, मनीषा पाटील या गुरुवारी पतीसह मुलगी भूमिका हिच्यासाठी कपडे घ्यायला आल्या होत्या. एका दुकानात कपडे घेत असताना गर्दीतील कोणीतरी त्यांना धक्का दिला,त्यात गळ्यातील मंगळसूत्र तुटून काळे मनी खाली पडले होते. त्यात सोन्याचे मनी व वाट्या नव्हत्या. आजूबाजूला शोध घेतला मात्र काही उपयोग झाला नाही. कोणीतरी मंगळसूत्र कापल्याची खात्री झाल्यानंतर सायंकाळी त्यांनी शहर पोलीस ठाणे गाठून तक्रार दिली. त्यानुसार गुन्हा दाखल करण्यात आला आहे.