जळगाव : महाराष्ट्र सार्वत्रिक विद्यापीठ अधिनियम २०१६ मधील तरतुदीचा भंग करून केलेल्या नेमणुकांसह अधिकाऱ्यांच्या गैरकारभाराबाबत दीड वर्ष उलटले तरी समिती नेमण्यात न आल्याच्या मुद्यावरून कवयित्री बहिणाबाई चौधरी उत्तर महाराष्ट्र विद्यापीठाची अधिसभा बैठक गाजणार आहे.
कवयित्री बहिणाबाई चौधरी उत्तर महाराष्ट्र विद्यापीठातील अत्यंत महत्त्वाची समजली जाणाऱ्या अर्थसंकल्पाची अधिसभा बैठक आता मंगळवार, २९ रोजी होणार आहे. ही बैठक २५ मार्च रोजी आयोजित करण्यात आली होती. परंतु, कुलगुरूंची उशिरा एंट्री व बैठक ऑफलाइनचं घ्यावी, या मुद्यावरून सदस्यांनी दीड तास गोंधळ घातल्यानंतर बैठक स्थगित करण्यात आली होती. दरम्यान, ही बैठक आताही ऑनलाइनचं घेतली जाणार आहे. मंगळवारी सकाळी ११ वाजता प्रभारी कुलगुरू यांच्या अध्यक्षतेखाली ही बैठक होईल. विविध विषयांवर अधिसभा गाजणार आहे. यात विद्यापीठ अधिनियम २०१६ मधील तरतुदींचा भंग करून झालेल्या नेमणुका यांच्यासह अधिसभा सदस्यांना अधिसभेत चर्चेसाठी आवश्यक असलेली माहिती पुरविली जात नाही व एका अधिकाऱ्याच्या गैरकारभाराबाबत तत्कालीन कुलगुरुंनी चौकशी करण्याचे आदेश दिलेले होते. तरीही चौकशी समिती नेमण्यात आलेली नसल्याच्या मुद्यावरून विद्यापीठ प्रशासनाला चांगलेचं धारेवर धरले जाणार आहे.
ऑफलाइनसाठी गोंधळ, तरीही बैठक ऑनलाइन
२५ मार्च रोजी आयोजित अधिसभा ही पुढे ढकलण्यात यावी व ती ऑफलाइन पध्दतीने घेण्यात यावी, अशी आग्रही मागणी करीत अधिसभा सदस्यांनी गोंधळ घातला होता. त्यानंतर ऑफलाइन बैठक घेण्यात येणार असल्याचे आश्वासन देण्यात आले होते. परंतु, मंगळवारी आयोजित बैैठक ही ऑनलाइन पध्दतीने होणार आहे. त्यामुळे या मुद्यावरून देखील बैठक गाजण्याची शक्यता आहे.
मुलाखती स्थगित
काही दिवसांपूर्वी अधिष्ठाता व डायरेक्टर पदासाठी विद्यापीठाकडून जाहिरात काढण्यात आली होती. मात्र, या पदांसाठीच्या मुलाखती काही महिन्यांसाठी स्थगित करण्यात आली असल्याची माहिती कुलगुरू यांनी लोकमतशी बोलताना दिली. नियमित कुलगुरूंच्या नियुक्तीनंतर ह्या मुलाखती होण्याची शक्यता आहे.