वरणगाव : येथील नगरपरिषदेच्या निवडणूक याद्यांवर आक्षेप व हरकती घेण्याचा सोमवारी अखेरचा दिवस होता. त्यावर अक्षरश: तक्रारीचा व आक्षेपांचा जणू काही पाऊसच पडला. त्यासाठी शिवसेनेचे शिष्टमंडळ नगरपरिषदेत जाऊन धडकले आणि लेखी स्वरुपात पुराव्यांसह हरकती आणि तक्रारी दाखल करण्यात आल्या. यापूर्वीच १३४९ हरकती दाखल झालेल्या होत्या आणि आज सुमारे एक हजारच्या आसपास तक्रारी प्राप्त झाल्या. या तक्रारींचे निरसन करून याद्या अद्ययावत न केल्यास वेळप्रसंगी औरंगाबाद उच्च न्यायालयामध्ये जाण्याचा इशारा शिवसेनेच्या वतीने तालुकाप्रमुख समाधान महाजन व सर्व पदाधिकाऱ्यांनी नगरपालिकेच्या उपमुख्य कार्यकारी अधिकारी सूर्यवंशी व इतर अधिकाऱ्यांना दिला.१५ फेब्रुवारी २०१९ रोजी नगरपरिषदेने प्रसिद्ध केलेल्या प्रारूप याद्यांमध्ये प्रचंड घोळ आहे. नियमबाह्य पद्धतीने बेकायदेशीर नावे त्यात समाविष्ट करण्यात आली आहेत. मतदार प्रत्यक्षात ज्या ठिकाणी राहात आहे तिथेच त्याचे नाव नोंदणी अपेक्षित आहे परंतु असे न करता त्यांची नोंदणी इतर प्रभागांमध्ये करण्यात आली आहे. काही मतदार वरणगाव शहरात राहत नसूनदेखील बनावट आणि खोट्या कागदपत्रांच्या आधारे राजकीय हेतूने नगरपालिकेच्या काही अधिकाऱ्यांना हाताशी धरून राजकारण्यांनी याद्यांमध्ये प्रचंड घोळ निर्माण केला आहे. या याद्या नियमाप्रमाणे बिनचूक करून लोकशाही मार्गाने निवडणुका पार पाडाव्यात, अशी अपेक्षा शिवसेनेच्या वतीने व्यक्त करण्यात आली.याद्यांमधील दुरुस्त्या न केल्यास शिवसेना आपल्या पद्धतीने पाठपुरावा करेल, असा इशारा देण्यात आला. या शिष्टमंडळात रावेर लोकसभा मतदारसंघाचे उपजिल्हा संघटक विलास मुळे, उपजिल्हा प्रमुख प्रा.उत्तम सुरवाडे, तालुकाप्रमुख समाधान महाजन, निळू सरोदे, सुभाष चौधरी, सईद मुल्ला, सागर वंजारी, राहुल बावणे, सुरेश चौधरी आदी उपस्थित होते. दरम्यान, दुसरीकडे उपनगराध्यक्ष शेख अखलाक यांच्या वार्डातसुध्दा अनोळखी नवीन मतदारांची नावे समाविष्ट करण्यात आल्याने त्यांनीसुध्दा न्यायालयात जाण्याचा इशारा दिला आहे.
वरणगाव न.प. याद्यांमध्ये प्रचंड घोळ
By लोकमत न्यूज नेटवर्क | Updated: February 23, 2021 16:18 IST