रावेर : पोलिसांनी पाठलाग करून पकडले
लोकमत न्यूज नेटवर्क
रावेर : चांदीच्या दागिन्यांचे पॉलिश करून चमकवून देण्याच्या बहाण्याने ११ हजार रुपयांची चांदी घेऊन पसार झालेल्या दोन जणांना पोलिसांनी पाठलाग करून पकडले. ही घटना सातपुड्याच्या दुर्गम भागात ताडजिन्सी व विश्राम जिन्सी गावात मंगळवारी दुपारी १२ वाजता घडली.
करणकुमार सुबोधप्रसाद साह व राजकुमार प्रदीप साह भागलपूर (दोघे रा. भागलपूर, बिहार) अशी या अटक केलेल्या भामट्यांची नावे आहेत. ताडजिन्सी गावातील शरीफ रज्जाक तडवी यांनी या दोघांकडे २५ भार वजनाच्या चांदीच्या तोरड्यांना पॉलिश करण्यासाठी दिले. त्यावेळी हातचलाखी करून त्यातून चार हजार रुपये किमतीची चांदी लांबवली. दरम्यान, रमजान सुल्तान तडवी व जुम्मा तडवी यांना असाच अनुभव आला.
ही बाब दागिने मालकांच्या ध्यानात येताच त्यांनी रावेर पोलीस स्टेशनचे पोलीस निरीक्षक रामदास वाकोडे यांच्याशी संपर्क साधला. त्यांनी पो.कॉ.
उमेश नरवाडे व सचिन गायकवाड यांना तातडीने घटनास्थळी रवाना केले. त्यावेळी आरोपी विश्रामजिन्सी गावातून गारबर्डी गावाकडे येत होते. पोलिसांनी पाठलाग करून या भामट्यांच्या मुसक्या आवळल्या. याप्रकरणी शरीफ रज्जाक तडवी यांनी दिलेल्या फिर्यादीवरून रावेर पोलिसांत गुन्हा दाखल करण्यात आला आहे. दोघांकडील मोटारसायकलही जप्त करण्यात आली आहे.
न्या.ए. एच. बाजड यांनी आरोपींना तीन दिवसांची पोलीस कोठडी सुनावली आहे. तपास हेकॉ. राजेंद्र राठोड, नरेंद्र बाविस्कर तपास करीत आहेत.